Ben Davies tan contract thar

Ben Davies chuan season thum daih contract thar a ziak.Kum 2025 June thla thleng Tottenham Hotspurs tana khel chhunzawm turin inremna an siam a, a contract hi a hmang zo a nih chuan North London club tan kum 10 chuang hun a hmang dawn tihna a ni.

Kum 29 mi defender hian 2014 khan Swansea aṭangin Spurs hi a zawm, season hmasa khan inelna hrang hrangah match 43 a khel. Antonio Conte kaihhruaina hnuaiah hmun pawimawh a chang, match hnuhnung lam 27 bikah phei chuan bul a ṭan vek.

Tottenham hi Premier League-ah palina a nihpui a, season tharah chuan Champions League an khel ang. North London club tana match a khelh tawh zawng zawng chu vawi 270 niin, goal ruk a khung bakah assist vawi 22 a nei tawh.

Welsh international hi a nihna takah chuan left back a ni. Mahse, Italian manager Conte-a'n tlarhnung laiah Eric Dier leh Cristian Romero te nen a din tlar tir ṭhin a, season tharah pawh a khelhna hmun hi a sirah ni loin a laiah a nih chhunzawm a rinawm.

Tun nipui bazar chhungin Tottenham hian Richarlison, Yves Bissouma, Djed Spence, Ivan Perisic leh Fraser Forster te an lalut tawh a, season hmasaa palina ni thei team hian a hma aia san an tum ngei ang.