Alli khelh danah Lampard a lawm

Season thar inbuat­saihna match an khelh tawh hoah Everton chu a vawi khat nan an chak a, goal khungtu Dele Alli bakah player dangte khelh danah manager Frank Lampard chuan a lawm thu a sawi.

Everton hian Bloom­field Road-ah Blackpool 4-2 in an hneh. Toffees tan Vitalii Mykolenko leh Tom Davies ten goal an khung bakah, midfielder Alli chuan goal hnih a khung.

Lampard-a naute hian Arsenal 2-0 a an ngam loh hnuah Major League Soccer club Minnesota United lakah 4-0 in an mualpho. An result a chhiat em avang hian Goodison Park kawtah fans lungawi lo an pungkhawm hman hial.

English manager Lampard chuan, "Tottenham tana Alli goal khung tam tak ka hmu tawh a, khatiang khan Everton-ah pawh a tih kan lo beisei ṭhin. Kan beiseina chu a takin a rawn lantir tak avangin a lawmawm hle.

"Goal a khung bakah a ṭhiante tan a ṭangkai hle, season pangngai kan ṭan hunah pawh Alli dik tak hi hmuh zel ka duh ang. A zawna match hnih kan talbuai hnuah kan khelh dan phung kan nei let leh ta, vawn nun reng kan tum ang," a ti.

Inrinni zanah Dynamo Kyiv an hma­chhawn leh dawn a, season thara an match hmasa ber atan August 6 zanah Chelsea an mikhual nghal dawn. Blues pawh hi beisei anga pre season hmang ṭha lo ve tho an ni.