Chona hmachhawn turin ka inpeih - Pepe

Arsenal player man to ber Nicolas Pepe chuan khelmual chhunga hmun chan a tum ruh hle a, club thar zawm ai chuan Gunners tana khel phak tura beih a thlang zawk - season tharah khelhna hmun chan a inring.

Ivory Coast international hian 2019 khan Lille aṭangin pound maktaduai 72 zetin Arsenal a zawm a nih kha, mahse beisei angin a la khel chhuak lo. Mikel Arteta a rawn lan chinah phei chuan khelhna hmun a chang mumal meuh lo.

Kum 27 mi Pepe chuan, "Pre season kan hman chhungin ka thawkrim hle, thil tam tak pawh a danglam tawh. Arsenal tana khelh chhunzawm ka tum a, inelna ṭha kan chhawp chhuak ang," tiin a sawi.

Arsenal forward hi Leeds, Sevilla, Lyon leh Marseille te chuan an ngaihven vek, tun hnaiah Spanish club Sevilla hian lak tumin tha an thawh nawn nia sawi a awm bawk a, a hlawh beisei zat pek an huam niin an sawi bawk.

Gunners manager Arteta-a'n tlarhma a khel turin, a player neihsa bakah Gabriel Jesus leh Fabio Vieira te a lei belh tawh. Spanish manager hian tlarhma sir vei lam khel tur a la duh belh niin an sawi, winger Pepe tan chuan hei hi chona lian tak a ni ang.

Season thar inbuatsaihna hnuhnung ber atan Arsenal hian July 30, Inrinni tlai dar 5:00-ah Sevilla an hmachhawn dawn. Premier League an match hmasa ber atan August 6-ah Crystal Palace an lehchilh dawn a ni.