Vawiin aṭangin CYMA Football Round of 16 ; Lengpui Vs Ramhlun South
TṬ Royte Trophy - Inter Branch YMA Football Tournament-ah champion tura rinkai pahnih Lengpui leh Ramhlun South ten vawiin chawhma dar 11:00 hian inkhel hmuhnawm an lantir dawn. Chawhnu dar 1:30-a ITI Veng leh Zawlnuam Borai inhmachhawn tur pawh a nep chuang lo ang.
CYMA Football hi Lammualah chauh khelh tur a ni tawh a, inkhel en man hi Rs 30 a ni. Round of 16 aṭang hian LPS Vision leh Zonet ten live-in a pe chhuak ang.
Final Tenau
CYMA Football-ah Lengpui leh Ramhlun South hi vawi hnih an inhmachhawn tawh a, vawi khat ve ve an chak tawh a, team pahnih hian vawi khat ve ve nomawi an chawi tawh bawk.
Ramhlun South-ah footballer ṭha an awm khawm - Malsawmfela te unau pali Lalnunmawia, Vanlalthlamuana leh Eric Pazawna baka Samson Ramengmawia leh Zohmingliana Ralte te hming lam rik tur an nei ringawt pawh hi inchhuanna tham a ni.
Coach HC Zarzoliana chuan, "Tun hi kan kim ber ṭum a ni. Lengpui hi an fitness a ṭha a, han hlauh tham erawh an ni lo. Chhuantea a awm tawh dawn avangin an danglam hret a, amaherawhchu team ṭha zawk kan ni," tiin chak a inbeisei thu Vanglaini a hrilh.
MPL club Dinthar FC, Chanmari FC leh Chanmari West enkawl tawhtu coach Zara hian chhawr theih turin Ramhlun North FC captain Lalramthlamuana, India junior team tana khel tawh Lalremruata leh age group inelnaa India ram forward zinga langsar ber zinga mi Lalawmpuia bakah Mizoram junior team forward R. Lalthanmawia-te an an awm. Coach tawnhriat nei ṭha Zara a inrintawk pawh hi a mak lo.
Lengpui lamin Mizo football timawitu zinga mi Rohmingthanga an kawl a, ani hian coach leh player hna a chelh kawp.
Kum 2006-a Lengpui champion puitu Rohminga chuan, "Player hmabak nei kan duhsak a, fitness nei ṭha kan ngai pawimawh. Kan naute hi kum lamah naupang mah se tawnhriat erawh an nei ṭha a, Ramhlun South lakah hian kan vanneih zawk ka ring," a ti. A zam lo.
Round of 16 aṭangin Lengpuiin Bengaluru FC defender leh coach Rohminga nau ni bawk Lalchhuanmawia an chhawr thei tawh dawn.
Chhuantea bakah F. Lalremsanga (Aizawl FC), Joe Zoherliana (Lajong), Larry Lalrinawma (Hoffenheim-a inzir mek), Lalmuanzuala (Chanmari West FC), R. Lalhmangaihzuala (Chhinga Veng FC) leh Lalrokima (Mizoram Sub Junior) te an kawl. Lengpui fitness a ṭha zawk a, last 16 match hmasa ber hi final tenau ang hiala chhal theih a ni.
Lengpui hian jersey sen nen Lammual an lut dawn a, an ṭhutna tur chu K. Kawla Stand leh S. Malsawmltuanga Stand a ni. Ramhlun South-in jersey var an ha dawn a, final tluk zeta lian a nih tawh avangin an var nghal ṭhuau ang. An ṭhutna tur chu Zomuanthanga Stand leh Zohminga Zote Stand a ni.
Inkhel pahnihna
ITI Veng leh Zawlnuam Borai te an langsar tawk lo a ni thei a, amaherawhchu team pahnih player thlirin last 16 hi vanneih vanga lut an ni lo.
ITI Veng lam hi keeper ṭha H. Lalremruata leh defender tawnhriat nei ṭha Zohmangaiha ten an ho a, tlarhma lam tichak turin Jerry F. Zonunsanga te an nei bawk.
Zawlnuam Borai lamah MPL player rual MS Dawngzela (Notea), Zaithanmawia leh Lalhruaitluanga te hi Aizawla tlangnel tawh vek an ni a, team pahnihah chak tura rinkai zawk an awm lo.
LAST 16 - FIXTURES
Vawiin Inkhel Tur
11:00 AM Lengpui Vs Ramhlun South
01:30 PM ITI Veng Vs Zawlnuam Borai
June 6, Thawhlehni
11:00 AM Aizawl Venglai Vs Chhinga Veng
01:30 PM Durtlang Vs Salem Veng
June 7, Nilaini
11:00 AM College Veng Vs Leitan
01:30 PM Chaltlang Vs Bawngkawn
June 8, Ningani
11:00 AM Republic Veng Vs Hualngohmun
01:30 PM Chanmari Vs Republic Vengthlang