Europe roreltu Real Madrid
Europe-a football club inelna sang berin Champions League hming a put hnua champion zawn thei hmasa ber chu Real Madrid an ni.
Inrinni zan khan Zinedine Zidane-a naute hian Wales khawpui Cardiff-a final khelhah 4-1 in Juventus an sawp a, Europe-a club thiam ber an ni leh ta.
Cristiano Ronaldo ropuina a zual zel - Portuguese forward hian Real tan goal hnih khungin Champions League final pathuma goal khung thei awm chhun a ni a, Juve player-ten an ngam loh chu Ronaldo ngei a ni.
Real Madrid forward Ronaldo dang tur khawpa ṭha khawvelah an awm rih lo. Real tan Ronaldo goal khung inkarah Casemiro-a'n kawh pawtin goal a khung a, hun pek belha substitute Marco Asensio goal khung chu Real chak nemnghehna goal mai a ni tawh.
Juventus-in si khat lek an phurh laiin Champions League final-a goal mawi ber zinga chhiar ngam Mario Mandzukic goal hmangin an si phurh sut mah se, beisei an phak lo chhunzawm - fak hla sa tura an inrin zanah Turin khawpui a reh ṭhuap. Juve substitute Juan Cuadrado chu minute 84-naah a yellow card pahnihna avangin hnawhchhuah a ni.
The Ronaldo Final
2006 FA Cup final kha Liverpool legend Steven Gerrard khelh ropui vanga 'The Gerrard Final' tih a nih chuan a aia inelna ropui zawk Cardiff khawpuia inkhel hi 'The Ronaldo Final' tih a nih lohna chhan tur a awm lo - inkhel ṭantir aṭanga a tawp thlengin Portugal captain hi a changtupa a ni tluan chhuak zak.
Minute 20-na lekah Dani Carvajal hnen aṭanga a ball hmuh chu hmahruaina goal ni turin a khung a, minute 64-naah an goal thumna a khung bawk.
Juventus-in an Champions League final kalkawngah minute 1,080 chhungin goal thum chauh an chhuah a, Ronaldo hmaah erawh dawl zawrin an zawr. Kum 32-a upa forward thiamna, tlan chakna, tharum, finna, ball thiamna leh chak duhna thinlungte chu Juve tlarhnungin an dang zo lo. First half-ah Real in beisei phak lo mah se chawlhlawk hman a nih hnuah erawh Italian club tlarhnung an chhaih mangang takzet.
Old Lady an chul
Kum dang zawng aiin Juventus-in champion tura rin an hlawh a, quarterfinal aṭanga Barcelona hnawt chhuaka Lionel Messi, Neymar leh Luis Suarez dah niltu club-in rin an hlawh pawh hi a awm lo hran lo.
Tlarhnung neih ṭhat vanga hming ṭha ṭhin Old Lady (Juve sawina)-in tlarhmaah Gonzalo Higuain an nei tawh bawk si a, Real hneh turin an ṭha tawk.
Cardiff khawpuiah pawh Mandzukic goal mawi piah lamah Miralem Pjanic hmangin goal hmahruai an khung teuh hle.
Mahse, second half-ah Juve an 'chuai' thut a, tho leh tur an awm tawh lo. Kum 2003, 2015 leh 2017 Champions League final-a tlawm Juve keeper Gianluigi Buffon chuan, "Second half-a kan khelh dan ang kha ka hrethiam lo. Real-in chak an phu zawk," a ti. Kum 39 leh ni 126-a upa keeper hian Champions League nomawi chawi loa football khawvel a mangṭha a nih pawhin a mak lo ang.
Record Ngaihnawm
Mario Mandzukic-a'n (Bayern Munich, Juventus) goal a khung chiah khan European Cup/Champions League final-a club hran pahnih tana goal khung thei pathumna a ni. Croatian striker hma hian Velibor Vasovic (Partizan Belgrade, Ajax) leh Cristiano Ronaldo (Manchester United, Real Madrid) te chuan he dinhmun hi an lo luah tawh.
Champions League tia hming thlak a nih hnua nomawi humhim thei hmasa ber chu Real an ni a, Zidane hi European Cup/Champions League-a Arrigo Sacchi, AC Milan (1989, 1990) hnua manager nomawi humhim thei hmasa ber a ni bawk.
Real-in European Cup final an luh hnuhnung parukah hnehna an la chang vek a, an tlawm hnuhnung ber chu kum 1981 final-a Juventus an hneh loh kha a ni. Spanish club hi Champions League-a goal 500 chuang (503 goals) khung thei hmasa ber an ni a, goal 500-na khungtu chu Ronaldo bawk a ni. Kum 39 leh ni 126-a upa Gianluigi Buffon chu European Cup final-a inlan thei upa pathumna a ni.