Coach ṭha ber ka ni lo - Zidane
Real Madrid legend Zinedine Zidane-a'n January 2016-ah coaching khawvel luhchilhin Real a enkawl ṭan ve chauh a, manager dang te tih theih ngai loh a ti nghal - Champions League-ah a zawna champion hmasa ber manager a ni. Mahse, tun season-a La Liga nomawi chawi teltu French manager a ṭawng pawr duh lo.
Zizou chuan, "Khawvela coach ṭha ber ka ni lo. Thil chiang tak erawh Real-ah ka cham zel dawn a, season thar kan thlir leh der tawh. Tunah erawh kan hlawhtlinna hi hlim takin kan lawm phawt ang. Champions League leh league nomawi chawi kawp hi thil awlsam a nih loh avangin kan hnathawhah hian kan lawm takzet.Thawhrimna leh tumruhna hmangin tun dinhmun hi kan inpetkai a, kum duhawm tak a ni," a ti.
Kum 44-a upa manager hian Europe-a champion aiin Spain champion nih chu a ngaihhlut zawk thu sawi nghalin, "Ni duhawm tak ve ve a ni a, a danglam lo. Mahse, La Liga nomawi ka chawi erawh ka career-a ka hlim ber ṭum a ni. League nomawi chawi tur chuan match 38 khelh a ngai a, a hlu bik a ni," tiin a sawi.
Tunah chuan French manager hian a nomawi hunna dawhkanah Champions League (2), La Liga (1), FIFA Club World Cup (1) leh UEFA Super Cup (1) a nei ta - heng zawng zawng hlawh chhuak tur hian kum khat leh a chanve bak a mamawh lo!