Juve tawpna a la ni lo

Turin khawpuiah Juventus champion lai hmuh beiseiin fans tam tak an pungkhawm a, Piazza San Carlo-a halmawi hal avanga mipui inpawng nekna karah mi 1000 velin hliam an tuar - heng zingah hian mipa naupang kum sarih mi chu a dinhmun a ngaihtuahawm hle nia sawi a ni a, buaina chhuah lai hi inkhel tawp nan minute 10 vel a la awm tihin a ni.

BBC reporter John Bennett chuan, "Turin khawpuiah mi 40,000 vel an pungkhawm a, Real-in goal an khung apiang khan hriau pawh thlauh ila, a ri a hriat theih ang tih tur khawpin thawm a reh. Kum hnih kal taa Barcelona nena an inkhelah kha chuan final luhah ngawt pawh an lawm a, tun season-ah erawh champion an inbeisei takzet" a ti.

Turin khawpui a ngui a, Juve manager Massimiliano Allegri-a'n hnual a tum ve lo. Italian manager chuan, "Tun hi Juve tawpna a la ni lo. Season tharah pawh Buffon hi kan goalkeeper a la ni dawn a, Andrea Barzagli pawh a la cham dawn. Heng ka player-te hian theihna tam tak pek tur an la nei a ni. Tunah chuan chawlh hahdam phawt kan mamawh a, a hma zawng aia tumna nasa zawk nen kan lo kir leh ang. Football mawina chu chance min pe zel hi a ni a, chu chu season thara kan tum chu a ni," tiin a sawi.