Arsenal ngaihven Mahrez

Arsenal manager Arsene Wenger chuan Leicester City winger Riyad Mahrez an ngaihven thu a zep lo a, mahse tun dinhmunah chuan indawrna an la neih rih loh thu a sawi tel bawk.

Kum 26-a upa Mahrez hian nikum August thla khan Foxes tan kum li daih contract a ziak. Mahse, May thla tawp khan club chhuahsan a duh thu Foxes hotute hnenah a thlen tawh.

Season hnih daih contract ziak hlim Wenger chuan, "Tunah chuan indawrna kan la nei lo, a awmzia chu indawr thei kan ni a, indawr lo thei kan ni bawk. Leicester-in league nomawi an chawi theih nan khan player ṭangkai a ni a, team ti chak thei tur a ni," tiin a sawi.

Algeria international hi kum 2016 khan PFA player of the year niin Premier League champion Foxes player pawimawh a ni a, season liam ta khan a club tan inelna hrang hrangah match 48 khelin goal 10 a khung a, a ṭhian­te goal khung tur vawi sarih siamsakin a team hi 12-na a nihpui.

Arsenal hian an player pawi­mawh pahnih Mesut Ozil leh Alexis Sanchez te contract an la ti fel lo a, manager Wenger chuan Ozil leh Sanchez te hian season khat daih contract an la neih avangin tun nipui transfer-ah chuan an chhuah loh tur thu a sawi.