Djokovic vanneih niah Nadal chak chiang

French Open khelh mekah mipa singles nomawi chawi thei tura rinkai ten hnehna an chang chho zel. Zirtawpni zan khan Novak Djokovic leh Rafael Nadal ten third round an paltlang a, Inrinni zan khan Andy Murray pawhin last 16 an inhlangkai ve bawk.

Champion lai Djokovic-a'n Diego Schwartzman lakah fiahna hautak a paltlang hram. Serbian tlangval hian set hmasa pathum zinga pahnih a hloh hnuah insiam ṭhain darkar thum leh minute 19 an inkhelh hnuah 5-7, 6-3, 3-6, 6-1, 6-1 in hnehna a chang hram a ni.

World number 2 Djokovic hian vawi 55 zet unforced error a nei a, Grand Slam danga a khelh dan nena khaikhin chuan a nei hnem hle. Nizan khan Albert Ramos-Vinolas nen an inhmachhawn a, he thu buatsaih lai hian result kan hre hman lo.

Kum 30-a upa Djokovic hian Roland Garros bikah vawi 58 hnehna a chang ta chiah. He inelna bikah hian Guillermo Vilas nen hnehna an chan zat a inang chiah a, hnehna chan hnem lama a tluk loh chu Rafael Nadal (75) leh Roger Federer (65) te chiah an ni.

Nadal an dal lo

A vawi 10 nana nomawi chawi tum Nadal-a'n third round paltlang turin harsatna a la tawk lo. Spain tlangval hian darkar khat leh a chanve chhung lekin Nikoloz Basilashvili chu 6-0, 6-1, 6-0 in a sawp.

Inrinnia kum 31 tling hlim Nadal hian French Open nomawi a chawi a nih chuan record thar a ni ang. Open Era bikah Grand Slam mala vawi 10 champion thei hmasa ber a ni dawn a ni.

Australian legend Margaret Court-i khan kum 1960 leh 1973 inkar khan Australia Open nomawi vawi 11 zet a lo chawi tawh a, hei hi chu Open Era hmalam a nih avangin Nadal te hun lai nena khaikhin theih a ni lo ang.

Grand Slam vawi 14 cham­pion tawh Nadal chuan, "Tun hnaiah chuan ka khelh ṭhat ber ṭum a ni hial ang. Basilashvili nen hian tun hmain kan la intawng ngai lo a, ka beisei aiin ball a vaw na hle. Chuti chungin hnehna ka chan theih avangin ka lawm hle," a ti.

Number 1 a chak

Andy Murray-a'n zawi muang­­in hma a sawn zel. Inrin­ni zan inkhelah Murray hian player tawhkhirh ber tur zinga ngaih Juan Martin del Potro chu 7-6 (10-8), 7-5, 6-0 in a hneh.

World number 1 Murray hian tunhma lama a la hlawhtlin ngai lohna hmunah nomawi chawi a tum mek a, last 16-ah chuan John Isner leh Karen Khachanov te inkhela chak zawk a hmachhawn leh ang.

Murray-a'n hnehna a chan lai hian Britain number 2 Kyle Edmund tan erawh a zinkawng a tawp. Edmund hi Kevin Anderson nen darkar li dawn an inkhelh hnuah 6-7 (6-8), 7-6 (7-4), 5-7, 6-1, 6-4 in a chak lo.

Inkhel dang

Seeded parukna Dominic Thiem-a'n Steve Johnson 6-1, 7-6 (7-4), 6-3 in a hneh. Kum 23-a upa Thiem hian French Open inbuatsaihna Rome Open-ah Nadal chu straight set-in an hneh, tun season clay court-a Nadal hneh thei awmchhun a nih avangin champion tura rinkai zingah a tel phak.

Season hmasa Wimbledon finalist Milos Raonic chu a khingpui Guillermo Garcia-Lopez a inhliam vangin inkhelh hah lutuk ngai loin last 16 a lut. Canadian star hian set khatna chu minute 21 chhung lekin 6-1 in a la a, set hnih naah game khat a lak hnuin Lopez hi a malpui na vangin a inhnukdawk a ni.

Grand Slam vawi thum champion tawh Stan Wawrinka-a'n Fabio Fognini 7-6 (7-2), 6-0, 6-2 in a sawp ve bawk. Kum 32-a upa Wawrinka hian kumin Roland Garros-ah hian set a la hloh miah lo; kum 2015-a a hlawhtlinna hmunah hian beiseina a nei sang hle a nih pawhin a mak lo.