Sri Lanka sawptu South Africa

ICC Champions Tro­phy khelh mekah South Africa chuan Inrinni khan Sri Lanka an sawp a, run 96-in hnehna an chang - South Africa tan Hashim Amla chuan century vaw chhuakin a khel ṭha takzet.

The Oval-a inkhelah South Africa an bat hmasa zawk a, over 50-ah run 299 vaw chhuakin wicket ruk chiah an hloh. Proteas (South Africa sawina) tan run 103 siamtu Amla bakah run 75 siamtu Faf du Plessis te an khel ṭha takzet a, Sri Lankan bowler-te an chhaih mangang hneh hle.

Sri Lanka bat hun a thleng a, opener Niroshan Dickwella (41) leh Kusal Mendis (57) ten khel ṭha viau mah se run 44 siama a tawp thleng dam Kusal Perera tih loh Sri Lankan batsman zingah an hnung zui zo an awm lo a, over 41.3-ah an vaia out vekin run 203 bak an tlin lo.

Proteas tan bowling lamah Imran Tahir a langsar a, kum 38-a upa bowler hian a kum tam deuh tawh mah se theihna sang tak a la nei reng a ni tih pholangin wicket li a la a, over 8.3-a vawmah run 27 chiah a pe bawk.

Zirtawpni tlaia inkhel tur New Zealand leh Aus­­tralia chu ruahsurin a tihbuai avangin inkhel tihtawp a ni a, team pahnih hian point an insem ang.