France chakna Giroud-a hattrick

Arsenal striker Olivier Giroud chu France tana kum 17 chhunga hattrick siam thei hmasa ber a ni. Zirtawpni zan friendly match-ah France hian an mikhual Paraguay chu 5-0 in an sawp.

France tan hian Giroud-a'n goal thum a khung bakah Tottenham mid­fielder Moussa Sissoko leh Atletico Madrid striker Antoine Griezmann ten goal khat ve ve an khung bawk.

Kum 2000 khan David Treze­guet-a'n France tan hattrick a siam a, Juventus striker hlui hnuah ram tan match khata goal thum khung thei an awm lo rei hle, tunah Giroud-a'n hattrick a rawn siam ve leh ta chiah a ni.

France manager Didier Des­champs chuan, "Giroud hian goal a khung reng a, kan team-ah chuan goal khung thei ber a ni mek. Goal a khung loh ṭum pawhin midang tan a ṭangkai thei hle," tiin Giroud a fak.

France hian Zirtawpniah World Cup qualifier khel turin Sweden an hmachhawn dawn a, June 13 zanah England chu friendly match an khelhpui leh bawk ang.

Friendly Match Results
Zirtawpni zan
Mexico 3 - 1 Republic od Ireland
Northern Ireland 1 - 0 New Zealand
France 5 - 0 Paraguay
Inrinni zan
Chile 3 - 0 Burkina Faso
Nicaragua 0 - 1 Bolivia
Portugal 4 - 0 Cyprus