Liverpool-in Mohamed Salah an dawr

Season thara Champions League khel tur Liverpool chuan AS Roma winger Mohamed Salah lakluh tumin an dawr a, mah se Italian club hian pound maktaduai 28-a Reds dawrna chu an hnawl. Roma hian an player manah hian pound maktaduai 35 aṭanga 40 inkar an beisei nia tarlan a ni.

January 2014 khan Salah hian FC Basel aṭangin Reds hi a lo zawm ṭhelh tawh a, Anfield pan dawn anga a lan hnuah pound maktaduai 11-in Chelsea a zawm. Mahse, Blues-ah beisei a phak lo a, season khat a khelh hnuah Fiorentina leh Roma lamah loan-in an chhuahtir.

Roma tan hian kum khat loan-a a khelh hnuin nikum nipui lai khan Italian club hian pound maktaduai 15-in an la nghet a, tun season-ah Serie A-a pahnihna dinhmun an hauhna kawngah match 31 khelin goal 15 a khung. Inelna hrang hrangah match 41 khelin goal 19 a khung a, Jurgen Klopp-a'n a rim nghal chat hi a mak hran lo.

Reds hian Chelsea rawlthar duhawm Dominic Solanke chu inremna an neihpui tawh a, kum 19 leka upa striker hian July 1-ah Anfield a pan ang.