Ramhlunin TNT hnehin beiseina nei zel

Ramhlun Sporting Club chuan TNT, Muanna Veng hnehin GIG Motors Pro Volleyball League semifinal luh an beiseina an siam thar ve leh ta a, inkhel dangah Hunthar chuan 3rd MAP an hneh ve bawk.

Zirtawpni zan R. Dengṭhuama Indoor Stadium, Mualpuia inkhelah Ramhlun hian 25-16, 25-23, 25-23 in hnehna an chang a, point 26 hmutu Suresh Chandra Khoiwal Vicky chu LG D3 Player of the Night atan thlan a ni a, an match hmasa zawkah Chhinga Veng hneh lo mah se Kerala police VP Hafeel an chhawr thei tawh a, ani hian point sarih hlawh chhuakin player ṭangkai a ni.

RSC hian an league round hnuhnung pahnihah Hunthar leh 3rd MAP an la hmachhawn leh dawn. TNT hian inkhel tur pakhat bak an nei tawh lo, an khingpui tur chu table-a hmahruaitu leh set la hloh miah lo Chhinga Veng an ni.

Inrinni zan inkhelah Hunthar chuan table-a pahnihna ni turin 3rd MAP 25-17, 25-21, 21-25, 27-29, 15-13 (3-2) in an hneh. Hunthar tan Sarang S Lal chu player hmuhnawm leh ṭangkai a ni. Sarang hian Police lakah point 27 hmuin a vawi khat nan LG D3 Player of the Night trophy a dawng.

Mizo hlanga khel MAP-in chak ni hmel an la hmu ve lo a, vawi thum an khelh tawhah TNT leh Hunthar lakah set hnih ve ve an lak avangin point khat ve ve an hmu a, point hnih kawl tawhin a mawngphahah an awm.

Team Dinhmun
Club Pld W L SW SL Pts
Chhinga Veng 3 3 0 9 0 9
Hunthar Veng 3 2 1 6 7 4
RSC 2 1 1 3 3 3
TNT 3 1 2 5 8 3
3rd MAP 3 0 3 4 9 2
(Note : SW - set lak, SL - set hloh)