Gomes-a'n United chhuahsan dawn?

Manchester United manager Ole Gunnar Solskjaer chuan forward Angel Gomes chu chhuak thei dinhmuna a din thu a sawi. English forward hi June 30 zawhah a contract a tawp dawn a, United nen hian contract pawtsei turin indawr chho mek mah se inremna an hmuh a rinawm ta lo.

Kar liam ta khan Solskjaer chuan inremna an neih ngei a rin thu sawi mah se nimin tlai press conference-ah thil awm dan a danglam thu a sawi. Norwegian manager chuan, "Thu thar a awm lo. Kan beisei ang a thlen a rinawm lo. Nizan leh tukin thleng khan thu thar ka hre lo a, tun thlenga thu thar a awm loh reng chuan a chhuah mai a rinawm," tiin nimin tlai khan Gomes-a chanchin a sawi.

Kum 19  mi  Gomes hi August 31, 2000 khan Edmonton, England-ah a piang a, kum ruk mi a nih ṭangin United academy-ah a inzir ṭan. Kum 13 mi a nihin Under 17 inelnaah a tel tawh a, kum 14 a nihin Under 18 inelnaah bench-ah vawi hnih a ṭhu pha bawk. 

July 2015 khan Mizo naupangte pawhin an khelh ve tawh Manchester United Premier Cup-ah United tan a captain a, an team hi 12-na daih ni mah se Most Valuable Player atan an thlang. 

Gomes hi 5ft 3in chauha sang ni mah se a chet ran leh a thiam avangin academy a awm lai aṭangin hming a chher tawh a, May 2017 khan United academy player ṭha ber hnena an hlan ṭhin Jimmy Murphy Player of the Year award a dawng. May 21, 2017 khan Crystal Palace nen an inkhelh ṭumin Wayne Rooney a thlak a, kum 16 leh ni 263 mi niin Duncan Edwards hnua United tana khel thei naupang ber a ni a, kum 2000 a piang chin Premier League-a inlan hmasa ber a ni bawk.

India rama FIFA World Cup Under 17-a England an champion khan Angel Gomes hian jersey number 10 hain captain a ni a, chutihrualin theihna sang tak nei mah se United tlarhma enin Gomes tan hmun a awmin a lang lo a, a khelh phakna tur zawngin United a chhuahsan a rinawm ta hle.