Aizawl Venglai aia dah san Chhinga Veng Durtlang el pha tur Salem Veng

TṬ Royte Trophy - Inter Branch YMA Football Tour­na­ment-ah NECS Cup cham­pion Chhinga Veng leh an ṭhen­awm Aizawl Venglai-te vawiin chawhma dar 11:00-ah hian an inhmachhawn dawn. Darkar hnih leh a chanve hnuah Durtlang leh Salem Veng inkhel hmuh tur a awm zui ang.

Aizawl Venglai leh Durtlang ṭantute K. Kawla Stand leh S. Malsawmtluanga Stand-ah ṭhut tur a ni a, Chhinga Veng leh Salem Veng ṭantute Zomuanthanga leh Zohminga Zote Stand-ah awm tur a ni thung. Lammual tlang lam chu neutral supporter tan zuah a ni.

NECS Cup champion fiahna
Chhinga Veng coach Jona­than Lalbiakkima (Jojo-a) chuan, "Kan khingpui tur hi kan pawt fuh a ni," tiin a sawi a, Aizawl Venglai coach Laltuak­liana Renthlei chuan, "Kan vanduai loh chuan kan chak turah ka ngai," tiin an ṭhenawm veng a hlau bik lo.

NECS Cup champion hian tlar­hmaah goal ruk khung tawh Lalkhawpuimawia an nei a, target man Mapuia hi player che rang Rochharzela leh Lalthlamuana ten an karcheh. Tlarhnungah K. Lalthlahlova leh Zomuanpuia te inkawpin midfield aṭangin Lalchhuanpuia'n a pui bawk a, Aizawl Venglai tan chak tur chuan inremfuh a pawimawh ang.

Aizawl FC coaching staff zinga mi Jojo-a chuan, "Aizawl Venglai pawh hian min tum châk ve tho ka ring a, châk leh châk kan inhmachhawn turah ka ngai. Veng mipui aṭangin ṭawiawmna ṭha tak kan nei a, player 12-na te hi kan chakna hnar an ni," tiin mipui puihna an mamawh tur thu a sawi.

Chhinga Veng hian player 25 zingah S. Malsawmtluanga an ziak lut a, Mizo footballer zinga ngaih­san hlawh ber zinga mi Mama hi second half-ah a inlan beisei a ni.

Mizoram Police coach Tuaka chuan, "Chhinga Veng khel hi ka hmu tawh a, dahsanna chhan tur an awmin ka hre lo. Football-ah chuan chak loh theih a ni a, kan chak erawh ka ring. Kan captain Rinzuala (Aizawl FC)a inhliam a, a inlan theih loh chuan kan buai deuh ang," tiin Vanglaini a hrilh.

Aizawl Venglaiin Mizoram goal­kee­per ṭha pahnih Lalawmpuia leh Vanlalhriata te an kawl a, an veng veteran player Lalram­nghaka ten an la ho theih bakah rawlthar beiseiawm an kawl nual. Chhinga Veng tan goal thum khung tawh pahnih F. Zosangliana leh Lalremsanga te hlamchhiah a thiang lo ang.

Phuba lak tum Salem Veng
Kum 2011 khan Red Rib­bon Football semifinal-ah Dur­tlangin Lammual phul lem phah tharah Salem Veng 8-0 in an sawp. CYMA Football-ah Durtlang hian penalty shootout-ah hnehna an chang leh a, Salem Veng tan vawiin hi phuba lakna remchang a ni.

Salem Veng coach Jerry Zoremmawia chuan, "Kan chak loh ṭum kha kan hre reng a, tunah chuan phuba la thei turin kan ṭha tawkin ka hria. Rawlthar rual bakah tawnhriat nei player ten min chawhpawlh ṭhat avangin veng mipui beiseina pawh a sang hle," tiin a player-te ṭhat tawk thu a sawi.

Salem Veng captain Israel Lal­dingngheta hi Santosh Trophy team zinga mi a ni a, Mizoram junior team playmaker R. Lalṭhapuia bakah India Under 21 trial tura koh David Lalchhuanawma-te chu an player hming langsar an ni.

Amaherawhchu, Salem Veng hian Zemabawk an hneh ṭuma hattrick siamtu Joseph Lalnunpuia an chhawr theih a rinawm lo a, chutihrualin Chhinga Veng FC player Joseph tel lo hian Salem Veng hian Khawlailung an hneh.

Salem Veng boss Jerry chuan, "Min sponsor-tu AIDU Motors - Renault, SIPMIU leh SORAZO te chungah kan lawm a, veng chhung mi tlawmngaiten kan mamawh tur sum an thawh khawm bawk. Veng mipui ṭawiawmna kan hmu ṭha a, thui tak kan thlen theih kan beisei a ni," tiin Durtlang chu an tawpna turah a ngai lo.

Durtlangin midfield-ah Ricky Lallawmawma an chhawr a, forward tlan chak Lalliansanga (Notea) chu an goal nawrna ber a ni. Tlarhmaah hian Khelo India-a Mizoram champion puitu captain leh top scorer Lal­ruat­fela a la awm bawk a, tlar­hnungah Germany-a inzir mek rawlthar Lalmuanzova Khawlhring-te chu an inghahna an ni pha a, an naupang seng sawng hle.

Durtlang coach R. Lal­lawmkima chuan, "Salem Veng kan hmachhawn tawhah hnehna kan chang vek a, tun ṭumah pawh hian kan chak leh ngei ka ring a ni," tiin team ṭha zawkah a inngaih thu a sawi.

Vawiin inkhela chak pahnih hi June 12, Thawhṭanni tlai dar 1:30 hian quarterfinal-ah an inhmachhawn ang.

Last 16 - Fixtures
Vawiin Inkhel Tur
11:00 AM Aizawl Venglai Vs Chhinga Veng
01:30 PM Durtlang Vs Salem Veng
June 7, Nilaini
11:00 AM College Veng Vs Leitan
01:30 PM Chaltlang Vs Bawngkawn
June 8, Ningani
11:00 AM Republic Veng Vs Hualngohmun
01:30 PM Chanmari Vs Republic Vengthlang