Hazard a hliam nâ

Chelsea midfielder Eden Hazard chu a ke rek tliak vangin thla thum chhung vel a inkhel thei dawn lo. Season thartir lamah kan hmu thei dawn lo tihna a ni.

Kum 26-a upa Hazard hi Belgium squad-ah telh a ni a, training-na lamah a hliam thu hi Belgian Football Association chuan an puang. Nizana Czech Republic nen friendly match an khelhah a inlan lo a, June 9-a Estonia nen World Cup qualifier an khelh hunah a inlan thei lo bawk ang.

Belgium international hi season hmasaa Chelsea-in Premier League nomawi an chawi theih nana player pawimawh ber pakhat a ni. League match 36 a khelh aṭangin goal 16 a khung.

Hazard hian Stamford Bridge-ah kum thum daih contract a nei mek a, hetih lai hian Champions League nomawi chawi hlim Real Madrid nen nen sawi zawm mek a ni.

Hazard chuan, "Madrid hian mi dawr a nih chuan ka inngaihtuah ang. Nomawi chawi ka duh a, a bik takin Champions League-a hlawhtlin ve ka chak hle. Mahse, Chelsea pawh hian Europe-a champion kan tum tho a, tunah chuan nakina thil lo thleng tur ka sawi lawk thei rih lo," tiin a sawi.