Lengpui vanduai niah Ramhlun S leh ITI Veng chak

Lengpuiin an goal hnih khung Ramhlun South lakah an hum zo lo. Penalty shootout-ah pawh Aizawl khaw pawn club hi dinhmun ṭha zawkah ding hman mah se a tawpah 2008 champion Ramhlun South an vannei.

Nimin khan TṬ Royte Trophy - Inter Branch YMA Football last 16 khelh ṭan a ni a, hun pang­ngaia 2-2 a nih hnuah Ramhlun South-in penalty shootout-ah Lengpui 5-4 in an hneh.

Inkhel hnuhnung zawkah ITI Vengin F. Lalduhawma goal hnih hmangin Zawl­nuam Bawrai 2-0 in hneh. Inelnaa top scorer hi last 16 aṭanga chhiar ṭan tur a ni a, nimina chak team hnih hi June 12 khian quarterfinal-ah an inhmachhawn ang.

Comeback ropui

Lengpui chhuanvawr Rohmingthanga chu coach ni chungin khelmualah a inlan a, footballer thiam bik a la ni zel - Aizawl FC player hian minute 29-naah goal hmahruai ṭha taka a khung hnuah a ball vawrh luh chu Ramhlun South defender Zohmingliana Ralte-in minute 39-naah an lamah a khung palh bawk.

Ramhlun South-in Lengpui fimkhur tawk loh rah sengin minute 42-naah corner kick aṭanga ball kal chu Lalnun­mawia'n a khung a, hei hian HC Zarzoliana hote beiseina thar a siam. Second half-ah Lengpuiin Rohminga inhliam an tuar a, team pumpui naupanna a lan bawk avangin Ramhlun South goal nawr na tak karah an talbuai - Van­lal­thlamuana leh Lalawm­puia ten chance ṭha bik an hlah a, injury time-ah substitute AwP-a'n si phurh sutna goal a khung.

Penalty shootout-ah Ramhlun South-in penal­ty hlah hmasa mah se Leng­puiin an hun ṭha neih an bawh pelh nawn a, coach Zara hote 5-4 in an chak.

ITI Veng an chungnung

Inkhel hnuhnung zawkah ITI Veng chu an khingpui Zawlnuam Bawrai lakah an chung­nung a, minute 15-na leka David Lalmuankima hmanga an goal khung pawm sak ni lo mah se quarterfinal lut turin harsatna an nei lo.

ITI Veng tan an veng club Youngstar United winger F. Lalduhawma'n hun chanve hma lam leh hnu lamah goal khat ve ve a khung a, 2-0 in an chak. ITI Veng tlarhnung pahnih Zohmangaiha Ralte leh H. Sanglianmawia te inkawp an khawng ṭha a, Zawlnuam Bawraiin goal an khung theih loh avangin CYMA Foot­ball-a an zinkawng a tawp.