Power Sporting Club final luh zan?

Kuminah a vawi khat nan GIG Motors Pro Volleyball League-ah hmeichhe inelna telh a ni a, zanin dar 8:00 hian R. Dengṭhuama Indoor Stadium, Mualpuiah league round khelh chhunzawm a ni dawn. Power Department Sporting Club-in Durtlang lakah hnehna an chang a nih chuan final an lut ang.

Kar hmasa khan Power hian Electric Veng 3-2 in an hneh tawh a, hmeichhia hi team pathum chiah an inlan avangin zanin hi an tan league round hnuhnung ber a ni nghal ang.

Hmeichhe team pathum inel zingah Power-in hma an hruai mek a, Electric lakah set hnih an hloh avangin point thum hmu zo lo mah se point hnih an kawl. Durtlang an hneh hrim hrimin final an lut dawn a, set hnih hloh lova an chak a nih chuan league-a sang ber ni chungin an tlang nghal tho ang.

Aizawl district champion Dur­tlang hian chona thar an hmachhawn ṭan dawn, kawng hrang hranga khaikhinin Power aia hnufual deuh zawka ngaih ni mah se inlehthalna thlentir tumin an inbuatsaih a, beiseina an nei sang hle.