Italy MotoGP roreltu Dovizioso

Pathianni zan Italian MotoGP tlan zawh takah Andrea Dovi­zioso chu pakhatna a ni a, rider cham­pionship-ah pahnihna dinhmun a luah chho nghal bawk.

Mugello, Italy-a intlansiakah Ducati rider Dovizioso hian hnehna chang turin minute 41 leh second 32.126 a mamawh a, pahnihna Maverick Vinales nen an inkarah second khat bak a awm lo! Italian rider Danilo Petrucci chu pathumna a ni a, training-na lama hliam tuar Valen­tino Rossi chu palina a ni bawk.

Tun season MotoGP intlansiak vawi ruk an neih tawh aṭangin Vinales-a'n point 105 hmuin hmahruaitu a ni mek. Yamaha rider Vinales hi Qatar Grand Prix, Argentine Grand Prix leh French Grand Prix-ah te pakhatna a ni.

Kum 31-a upa Dovizioso hian point 79 hmuin pahnihna dinhmun a rawn luah a, pathumna chu point 75 hmutu Rossi a ni. Intlansiak hmabak 12 an la nei a, a hmasa ber atan June 9-ah Spanish Grand Prix an tlan zui leh nghal dawn a ni.