Argentina coach-in Messi beisei sang

Argentina coach thar Jorge Sampaoli chuan a captain Lionel Messi lakah beiseina a neih san thu a sawi a, a thil tum hmasa pakhat chu 2018 World Cup khelh phak a nih thu a sawi tel bawk.

Argentina hian April thla khan an coach Edgar­do Bauza chu match riat chiah team a enkawl hman tihin an ban a, a hmun ruak luah tur hian Spa­nish club Sevilla coach hlui Sampaoli an lalut.

Kum 57-a upa Sam­paoli chuan, "Leo nen kan inbe tawh a, kan hlim hle. Ram tan chona kan hmachhawn dawn a ni a, Messi kaihhruaina hnuaiah kan ram hi Russia-a World Cup khel turin kan tlin theih ngei ka beisei," tiin a sawi.

Barcelona forward Messi hian ran tam match 117 a khelh aṭangin goal 58 a khung tawh a, ram tana goal khung hnem ber a ni mek.

Argentina hi South America aṭanga World Cup khelh tum ram 10 inel zingah pangana an ni mek. Ram pali chin hi Russia pan tura tling nghal tur an ni a, pangana hian playoff an khelh a ngai dawn.

Argentina hian match pali khelh hmabak an la nei. August 31 khian Uruguay an lenchilh dawn a, he mi hnuah Venezuela, Peru leh Ecuador te an la hmachhawn leh ang.