Pakistan sawpin India-in bul an tan
ICC Champions Trophy-a an match hmasa berah India-in harsatna an tawk lo. Champion lai hian Pathianni tlai khan Pakistan chu inkhel boruak sang takah an hmachhawn a, ruah sur vanga DL method hman a ngaihna inkhelah India hi run 124-in an chak.
Pathianni tlaia hmelma kumhlun India leh Pakistan inhmachhawnna hi Edgbaston, Birmingham-a ni a, inkhel entu mipui 24,156 zet pungkhawmin he hmuna ODI inkhelin entu a ngah ber ṭum a ni - inkhelh ṭan hma hauhin boruak a sang hle.
Bul ṭan ṭha India
India an bat hmasa zawk a, Rohit Sharma leh Shikhar Dhawan an lo pen chhuak. Batsman pahnihin inkhel ṭantirh aṭangin Pakistani bowler-te an ngam nghal 'sarh' a, Mumbai Indian captain Rohit Sharma chuan ball 119-a hmachhawnah run 91 vaw chhuak nghalin tun hnaia sawisel hlawh tak Dhawan chuan ball 65 lekah run 68 siamin amah sawiseltute a chhanglet bawk.
Over 24.3-ah India-in an wicket hmasa ber an hloh ve chauh a, an run siam zat chu 136 niin Shadab Khan-a ball vawmah Dhawan-a'n a bat hmawrin na takin a lo hlap a, Azhar Ali-a'n a lo catch out.
Kohli hming a mawi
Dhawan-a out hnuah Virat Kohli a lo lut a, Pakistan manganna belhchhahtu a ni. India captain hian a theihna sanzia pholangin ball 68 lek a hmachhawnah run 81 siamin a tawp thleng a dam a, ṭum dang ang bawkin a hmuhnawm lehpek hle.
Yuvraj Singh lam hmaih theih a ni lo. Over 36.4-naa Rohit Sharma out hnuah Indian batsman hmuhnawm hi a lo lut a, ball 32 lek a hmachhawnah run 53 a rawn vaw chhuak. Ruahsurin inkhel a tihbuai avangin over 50 khelh turah 48-ah tihtawi a ni a, India-in run 319 siamin wicket thum chiah an hloh. Pakistan bowler Wahab Riaz chuan over 8.4 a vawmah run 87 pein wicket a la miah lo a, Champions Trophy-ah hetianga vawm chhia bowler an la awm ngai lo.
Pakistan hun
Ruahsurin inkhel a tihbuai avangin DL method hman a ni a, Pakistan chu over 41-ah run 289 siam hman tura target siamsak an ni. Opener Azhar Ali chuan run 50 siamin bul rawn ṭan ṭha viau mah se Hardik Pandya laka a out hnuah Pakistani batsman zingah run 50 siam kai thei dang an awm tawh lo.
Over 33.4-ah Pakistan-in run 164 siamin wicket kua an hloh a, Wahab Riaz a inhliam avanga bat tur dang an neih tawh bawk si loh avangin Pakistan an tlawm - India-in hnehna hlado an chham khum.
Eng nge an sawi?
India captain Virat Kohli chuan, "Kan batting leh bowling kha en ila, 10-ah pakua inpe ngam tur chu kan niin ka hria a, fielding-ah erawh paruk bak ka inpe ngam lo. Kan fielding bikah hmasawnna tur kan la nei a, 10-ah pariat emaw pakua tal kan ni chho thei a nih chuan team ṭha tak kan ni tawh ang," tiin hmasawnna tur an la neih thu a sawi a, Pakistan laka an khelh dan chu chhuanawm a tih thu a sawi nghal bawk.
Pakistan captain Sarfraz Ahmed chuan, "Kan bowling mai ni lo kan batting thlengin thlir nawn kan ngai a, hmasawn kan ngaihna laite zirchiang tura ngaihtuahna kan sen ho leh a la ngai dawn a ni," tiin hmasawn an ngaih thu a sawi.
Vawiin Inkhel Tur
England 3:00 PM New Zealand