Golden State chakna Stephen Curry

Playoff china hneh loh nei loa NBA champion ni turin Golden State Warriors tan match hnih bak chak a ngai tawh lo. Nimin zing NBA Finals Game 2 inkhelah Golden State hian Cleveland Cavaliers 132-113 in an hneh a, series-ah 2-0 in hma an hruai. Steve Kerr-a naute hi NBA playoff-a match 14 chhung chak zawn thei hmasa ber an ni bawk.

Oracle Arena, Oakland-ah Stephen Curry chu player lang­sar leh lawm hlawh bik a nih chhunzawm. GSW guard hian court chhungah minute 36 hun a hman chhungin point 32 a score bakah rebound vawi 10 lain assist ṭum 11 a nei bawk - American star hian NBA playoff-ah a vawi khat nan triple double a nei a ni.

Kum 29-a upa Curry chuan, "Chak duhin kan tuihal a, court chhungah a rah kan hmu zel. Hnungzângna vanga inlan thei lo ṭhin kan coach Kerr a lo kir leh tawh bawk a, court sira ani kan zuk hmu kha a nuamin inrintawkna min pe, tun ṭum chu hlimna hlir a ni ber mai," tiin a sawi.

Curry show

Golden State hian inkhel bul ṭan ṭha zawkin hma an hruai nghal a, halftime-ah 67-64 niin an inthlahna chu point thum chiah a ni. Game 1-a chak lo Cavs lamin na takin an nawr reng a, an mualah Warriors an fal thei mai bik lo.

Third quarter an lut a, dang­lamna chu Curry a ni. Feet ruk leh inches thuma sang Curry hian quarter tumna chauhah point 12 a score bakah rebound vawi sarih a la a, assist vawi nga a nei bawk.

Hun pawimawhah hla deuh de daw aṭangin Curry hian 3-point a vawm luh bakah free throw vawi hnih a lut a, rang zeta LeBron James a bum hnuah layup hmangin point a nei zui bawk, quarter thumna an khelh zawh meuh chuan 102-88 a hmahruai puiin chak tur a chiang der tawh.

Golden State tan hian inkhel hmasa zawka point 38 score tu Kevin Durant chuan point 33 score-in rebound vawi 13 a nei bawk a, double double a nei. Curry leh Durant te bakah hian Klay Thompson (22 points), Shaun Livingston (10) leh Ian Clark (10) te chu player pawimawh leh ṭangkai an ni.

Season hmasa khan Warriors hian 3-1 a hma an hruai tawh hnuah Cleveland hi an inpawhthlaktir a. Ningani zing dar dar 6:30 hian Quicken Loans Arena-ah Game 3 an khel ang, a zawnin Cavs mualah vawi hnih an inlan ve thung tawh dawn a ni, inelna hautak a inṭan dawn.

Golden State coach Kerr chuan, "Hetianga chak zawn rei theih hi a ropuiin sawi pawh a nuam hle. Mahse, inkhel a la zo lo tih kan hriat a ṭha. Season hmasa pawh khan 2-0 a hma kan hruai hnuah kan chak lo tih kha kan theihnghilh thiang lo," tiin a ṭawng fimkhur hle. Kerr hian season hmasa khan regular season-ah a naute hi vawi 73 hnehna chanpuiin record an lo siam tawh.

Cleveland an chuai

Champion lai Cleveland tan an thiampuipa LeBron James-a'n point 29 a score bakah rebound vawi 11 lain a ṭhiante tan vawi 14 a siamsak bawk. NBA playoff-ah triple double vawi riat a neihna chiah a ni a, Los Angeles Lakers legend Magic Johnson-a record a tluk chiah - James leh Magic aia record nei ṭha an awm lo.

Kum 32-a upa James chuan, "Tun dinhmunah chuan record hi engmah lo mai a la ni rih a, nakinah chuan thil hlu takah a la chan theih ngei ka beisei," a ti. James hian mimal record nei ṭha mah se team-in hnehna an chan loh avangin lawmna tur a awm rih loh thu a sawi a ni.

Kum 1970 playoff-ah khan New York leh Milwaukee te an inhmachhawn a, Walt Frazier leh Lew Alcindor ten triple double an nei, he mi hnuah tun ṭum chiah hi team pahnih aṭanga player ve ve in triple double an neih rual lehna hmasa ber a ni.

Cavaliers coach Tyronn Lue chuan, "Tihsual kan ngah em em, a bik takin kan defence a ṭha tawk lo a, min hrem nghal zel a ni. 50-50 ball kha a hlohtu zawkah kan ṭang zel bawk, tunah chuan hahchawl hman kan ni lo a, kan tihsual siamṭha turin an inbuatsaih nghal ang," a ti.

Cavs tan hian James bakah point 27 score tu Kevin Love leh Kyrie Irving (19 points) ten an khel chhe lo, mahse coach Lue sawi angin hun pawimawhah ball an hloh fo a, a tawp an tuar tih a chiang.

Lue chuan sawi chhunzawm­in, "An khelmualah vawi hnih an chak a, tunah chuan kan court-ah match hnih kan khel ve leh dawn thung. An tih ang bawka thungrulh ve kan tum ang," a ti. Fans nei ṭha Cavs khelmual Quicken Loans Arena-ah "Cleveland, Cleveland, Cleveland" tia au thawm a ring leh khawp ang.