Nadal leh Djokovic inhnaih zel

Rafael Nadal tan French Open quarterfinal lut turin harsatna a la awm lo. Champion lai Novak Djokovic pawhin nomawi humhim tumin hmalam a pan zel bawk - player ropui pahnihte hi an chak chho zel a nih chuan semifinal-ah an inhmachhawn ang.

Suzanne Lenglen Court-a last 16 inkhelah Nadal hian darkar khat leh minute 50 chhung lekin Roberto Bautista Agut chu 6-1, 6-2, 6-2 in a sawp. Nadal hian Roland Garros nomawi a vawi 10 nana chawi turin match thum bak chak a mamawh tawh lo - quarterfinal-ah Pablo Carreno Busta nen an inhmachhawn leh ang.

Kum 31-a upa Nadal hian French Open bikah hian match 78 khel tawhin vawi hnih chiah chak loh a la nei, clay court inelna lianah hian quarterfinal vawi 11 a luhna chiah niin Roger Federer nen an record a intluk.

Spain tlangval Nadal hian kumin Roland Garros-ah amah elphak a la tawng lo, match li a khelh tawhah set a la hloh miah lo. Set 12 a khelh tawh a la fai vek a, match li aṭang hian game 21 bak a la hloh lo! Dan ngaihna awm lo khawpa ṭhain a khel mek.

Seeded palina Nadal chuan, "Season hmasa khan nomawi chawi beiseiin ka inlan a, mahse ka duhthusam a thleng thei lo. Kuminah a bul aṭangin ka ṭan ṭha leh a ni a, duhthusama ṭhain a hmawr bawk theih ngei ka tum," tiin a sawi. Season hmasa khan Nadal hi a banrek na vangin third round-ah a inhnukdawk a ni.

Djokovic thar

Grand Slam vawi 12 cham­pion tawh Djokovic-a'n season hmasa chawhnu lam aṭangin result a nei ṭha tawk lo, thla hmasa khan a coaching staff nen an inṭhen hial. French Open atan bik coach Andre Agassi nen an thawkdun, zawi muangin hma a sawn zel. Serbian tlangval hian seeded 19-na Albert Ramos-Vinolas chu darkar hnih leh minute 27 an inkhelh hnuah 7-6 (7-5), 6-1, 6-3 in a hneh.

Kum 30-a upa Djokovic hian Vinolas lakah hian double fault a nei miah lo a, a service vawi thum hloh mah se a khingpui service ṭum sarih a chhuhsak theih avangin inkhel inhnehtawk takah a dingchang zawkah a ṭang.

Inkhel dang

Kum 25-a upa Carreno Busta-a'n a vawi khat nan Grand Slam quarterfial a lut ve ta. Last 16-a a hneh hi seeded pangana Milos Raonic niin darkar li leh minute 17 zet an inkhelh hnuah 4-6, 7-6 (7-2), 6-7 (6-8), 6-4, 8-6 in hnehna a chang.

Seeded 20-na Carreno Busta hian world number 10 chin player a vawi khat hnehna a ni, semifinal lut tur chuan he hmuna vawi kua ngawt champion tawh Nadal a paltlang a ngai dawn. Tun hmain Nadal nen vawi thum an inkhel tawh a, a chak lo vek.

Asian tlangval pahnih inkhelah Japan chhuanvawr Kei Nishikori chuan seeded chang phak lo South Korean star Hyeon Chung chu 7-5, 6-4, 6-7 (4-7), 0-6, 6-4 in a hneh hram.

A service neih ṭhat hmangṭangkai ṭhin American John Isner chu Karen Khachanov lakah 7-6 (7-1), 6-3, 6-7 (5-7), 7-6 (7-3) in a chak lo. Russian rawlthar Khachanov hian nizan khan world number 1 Andy Murray a hmachhawn leh a, he thu buatsaih lai hian result kan hre hman lo.

Khawtual tlangval Gael Monfils leh Richard Gasquet te inkhel chu ruah surin a tibuai a, seeded 15-na Monfils hian 7-6 (7-5), 5-7, 4-3 a hma ahruai laiin a khingpui hi a malpui hliam vangin a inkhel zui thei lo bawk. Last 16-ah chuan Stan Wawrinka nen an inhmachhawn ve leh thung ang.