Mizo panga awmna India inlan dawn

AFC Asian Cup qua­lifier khel tura inbuatsaih mek India chuan zanin dar 7:00 hian Nepal nen friendly match an khel dawn a, Mumbai Football Arena-a inkhel tur hi Star Sports 2-ah live-in a en theih ang.

India squad-ah hian Mizo panga Lalruatthara, Jerry Lalrinzuala, Isaac Vanmalsawma, Jeje Lalpekhlua leh Daniel Lalhlimpuia te an awm mek a, a tira squad-a dah tel R. Laldanmawia a tel tawh lo thung.

Vanglaini thu dawn danin Udanta Singh leh CK Vineeth chu inhliam vangin an la inlan thei dawn lo a, tun hnaia Norwegian club Stabæk-a first choice keeper din­hmun luah chho ṭan mek Gurpreet Singh Sandhu chuan captain armband a hreng ang.

Bengaluru striker Sunil Chhetri chu chawlh hahdamna hun pek a ni dawn a, tlarhmaah Jeje Lalpekhlua chu India tan innghahna a ni dawn tihna a ni. Udanta leh CK Vineeth te an in­hliam avangin Daniel Lalhlim­puia tan chance a sang sawt tihna a ni a, Serchhip rawlthar hian Nepal lakah inkhel bul a ṭan a nih pawhin a mak lo ang.

India hian June 13-ah Asian Cup qualifier an khelh chhunzawm dawn a, Sree Kanteerava Stadium, Bangalore-ah Kyrgyzstan an mikhual dawn a ni.