Mizo telna tur 2022 Commonwealth Games ; Jeremy Lalrinnunga leh Lalremsiami Hmar

Ban phak loha kan ngaih kha an ban phak a, dai ngai loh ram nia kan hriat kha an pal darh zel. An chawrchhuahna ram chu zim leh tê tak, mite hriat hlawh ni lem lo mah se Mizo infiammi ropui Jeremy Lalrinnunga leh Lalremsiami Hmar te hian infiamna hmangin Mizo hming an chawi sang mek zel.

Ni tla sang loa roreltu tia hriat ṭhin Great Britain awpna hnuaiah ram tam tak an lo awm tawh ṭhin, chung mite infiamna hmanga inelna 2022 Commonwealth Games-ah Jeremy leh Remsiami te hi an tel dawn, Mizo pahnih hi India innghahna an ni phak.

Fapa Rangkachak
Mizo naupang boxing tui ve ṭhin tak, rin loh tak maia weightlifting luhchilh daihtu Jeremy Lalrinnunga hian India tan record duhawm a lo siam tawh. 2018 khan Youth Olympic Games-ah gold medal a chawi chhuak; India tana gold medal la thei hmasa ber a ni.

Argentina khawpuia inelna an neih ṭum hian kum 16 mi chauh a la ni a, 62kg category-ah a inlan. Tunah chuan a kum pawh a tam ve ta hret, a taksa pawh lian ve zelin tun inelnaah hian 67kg huangah a khel dawn.

Govt. Complex rawlthar Jeremy tan 67kg hi thil thar a ni hran lo. 2021 Commonwealth Senior Weightlifting Championship-ah khan gold medal a lo chawi chhuak daih tawh, hei vang hian Commonwealth Games 2022 atan pawh hian a tling nghal a ni.

June thla chawhnu lam khan inelna neihna tur hmun England a pan tawh. Birmingham-ah ngawrh takin training a nei reng a ni, tournament tak an khelh hmain thla khat vel Britain boruak a lo zuk tem lawk tihna a ni a, tunah chuan a mikhual tawh lo ang.

Sports and Youth Services (SYS) coach Malsawma Khiangte chuan, "Jeremy Lalrinnunga hi kan ring tawk a, a chesual viau a nih loh chuan gold emaw silver medal emaw a chawi chhuah theih ngei kan beisei, chawi sual loh erawh a pawimawh dawn.

"Commonwealth Senior Weightlifting Championship-ah khan amah hnaih bertu aiin 10kg vel laiin a chawi rit zawk. A elpui hautak tura kan ngaih Pakistan tlangval chu damdawi hman phal loh a hman avangin a tel thei dawn lo, chuvangin beisei kan nei sang," tiin Vanglaini a hrilh.

India Weightlifting Team
Mipa
1 Sanket Sarkar 55kg
2 Guruja 61kg
3 Jeremy Lalrinnunga 67kg
4 Ajay Singh 81kg
5 Vikas Thakur 96kg
6 Lovepreet Singh 109kg
7 Gurdeep Singh +109kg

Hmeichhia
1 Mirabai Chanu 49kg
2 Bindyarani Devi 55kg
3 Popy Hazarika 59kg
4 Harjinder Kaur 71kg
5 Punam Yadav 76kg
6 BN Usha 87kg
7 Purnima Pandey +87kg

Note: Jeremy Lalrinnunga hian July 31, Pathianni tlai dar 4:30-ah inelna a hmachhawn ang.

"Pathian zarah India tan medal hlawhchhuah theih ngei ka inbeisei. Inbuatsaihna ka nei ṭha em em a, ka taksa pawh a fit ṭhat lai tak a ni. Inelna a nih avangin tihsual leh fuh lo lai erawh a awm thei, fimkhur tak chungin inelna ka hmachhawn ang," - Jeremy Lalrinnunga, Weightlifter

Olympic, Hockey World Cup, Asian Games leh inelna liana India nulate inkhel hi TV aṭangin kan en ṭhin, hnam dangten thiam taka an khelh tur emaw kan tih kha tunah chuan Mizo nula Lalremsiami Hmar tel lo chuan a kalh a kim thei ta meuh lo.

Remsiami hi a dam ṭha a nih phawt chuan India tan koh a ni zel, tunah hian kum 22 mi chauh ni chungin India tan match 92 a khel tling der tawh. Match 100 khel tling turin hmabak a ngah tawh lo, goal 28 a khung tawh bawk.

Asian Games, Asian Champions Trophy leh Youth Olympic Games-ah te India tan silver medal a la vek tawh. Asia Cup-ah gold medal a lakpui tawh a, chubakah chuan bronze medal a vuak chhuahpui tawh bawk, tunah medal dang an beisei leh mek.

Tun hnai khan 2022 Women's FIH Hockey World Cup khelin Netherlands leh Spain-ah an feh chhuak. Spain aṭang hian India rama rawn haw loin England an pan tlang a, hei hi Birmingham lama inbuatsaihna hun thawl neih an duh vang a ni.

Hliam vangin Rani Rampal a la tel thei dawn lo. India captain leh striker ṭha ni bawk Rani a awm loh chuan Remsiami chungah mawhphurhna a sang zual leh dawn. Kolasib nula hi a ṭul hunah chuan midfielder atan an hmang ṭhin bawk.

Hockey Mizoram thu
Mizo tan chuan kumin Common-wealth Games hi chhinchiah tlak a ni, kan inlan vawi khatna tur a ni dawn. Hockey leh Weightlifting huangah kan Mizo pui ngei inlan kan hmu tur hi chanchin lawmawm leh hriatreng tur a ni ang.

Hockey Mizoram general secretary Lalrinfela chuan, "World Cup an khel zo chauh a, chumi hnuah Commonwealth Games khel turin Remsiami a tel tlang thei dawn tih kan hriat khan kan lawm takzet a, sawi tur kan hre loin lawm dan tur pawh kan thiam lo zawk.

"Kan thlen chin apiang mai hi lawmna tur a ni a, tualchhung mai ni loin India hriat kan hlawh tawh. Chumi piah lamah khawvel hmuh Mizo ṭhalaite infiamna huanga an lang hmuh hian min tilawm ṭhin," tiin Vanglaini a hrilh.

Remsiami hian a hun hmasa lamah chuan ṭawng chungchangah harsatna a tawk. Tunah erawh harsatna nei loin Hindi a hmang thei tawh a, English a hmang thei tawh bawk - khelmual chhungah a ṭhiante nena inbiak kawngah buaina a nei tawh lo.

Thenzawl Hockey Training Centre-a amah zirtirtu B. Lalroṭhuami chuan, "Siami lakah hi chuan beisei kan nei sang, a inkhel pawhin hma a sawn nasa hle. Kum naupang tak ni chungin India tan a inlan thei a, tun ṭumah pawh hian player pawimawh a ni ang," tiin Vanglaini a hrilh.

Commonwealth Games khel turin kan inpeih tawh. World Cup-ah khan ṭha takin kan khel a, result erawh duhthu a sam lo deuh. A hnu lamah inbuatsaihna kan nei ṭha chhunzawm, tunah chuan Pathian zarah medal lak ngei kan tum. "England hi a boruak a vawt angreng a, a chang chuan ni pawh a sa ve leh viau. Boruak awm dan erawh inkhelh harsat phahna tur a ni lo ang. Mizo mipuite min lo ṭawngṭaipui leh turin ka ngen a, ṭawngṭaina hi ka tan chuan chakna hnar a ni. - Lalremsiami Hmar, India Forward

Indian Squad
Goalkeepers: Savita (captain), Rajani Etimarpu
Defenders: Deep Grace Ekka (vice captain), Gurjit Kaur, Nikki Pradhan, Udita
Midfielders: Nisha, Sushila Chanu Pukhrambam, Monika, Neha, Jyoti, Navjot Kaur, Salima Tete
Forwards: Vandana Katariya, Lalremsiami Hmar, Navneet Kaur, Sharmila Devi, Sangita Kumari

India Fixtures
July 29, Inrinni
India 6:30 PM Ghana
July 30, Pathianni
India 11:30 PM Wales
August 2, Thawhlehni
India 6:30 PM England
August 3, Nilaini
India 03:30 PM Canada
Note: India inkhel hi Sony TV-ah live a en theih a ni ang.