Ropui leh tum Nottingham an ti mai mai lo
Premier League kai thar Nottingham Forest chuan player thar an lalut leh dawn ta a, VfB Stuttgart midfielder Orel Mangala chu lalut turin inremna an neihpui.
Forest tan nipui transfer-a an player lakluh 11-na tur a ni a, nimin khan medical neihpuiin, he thuziak i chhiar meuh chuan an lalut fel tawh hialin a rinawm.
Nottingham Forest hian Jesse Lingard chu football khawvel barakhaihin an lo lalut tawh bawk a, Nottingham hian season khat lek Premier League-a cham an tum lo.
A hming Mangala
Forest hian Mangala hi pound makta-duai 12.7-in an lalut dawn a, Belgium tan age level hrang hrangah lo inlan tawhin, March thla khan Belgium senior team tana a match hmasa ber a khel.
Kum 24 mi midfielder hian season hman zawh takah khan VfB Stuttgart tan inelna hrang hrangah match 29 khelin goal khat a khung a, assist vawi li a nei bawk.
Mangala hi Hamburger SV tan 2018-19 season kha loan-in a lo khel tawh a, hemi tih loh club dang tan a la khel lo - Premier League-ah chona thar hmachhawn turin a rawn pem dawn.
Hei le Lingard
Forest hian Mangala an lakluh hma hian player 10 ngawt an lalut tawh a, Union Berlin striker Taiwo Awoniyi, Liverpool defender Neco Williams leh Manchester United attacking midfielder Jesse Lingard te chu an lakluh langsar zual a ni.
A bik takin Lingard an lakluh hian sawi a hlawh lehzual - English midfielder hian United-ah beisei angin khel lo mah se a theihna sanzia chu West Ham-ah hmuhin a awm tawh a, hei vang hi a ni ang, West Ham, Everton, Leicester City, Tottenham Hotspur leh Newcastle United ten an dawr vek!
Mahse, rin loh ber Forest-in Premier League-ah tih mai mai an tum lo tih pholan nan Lingard an chuh ve chat a, an chang - kar khatah £200,000 dawn an hlawhtir dawn nia sawi a ni a, anni aia club lian zawkte aiin an ngam huai zawk.
A la tawk lo
European champion vawi hnih lo ni tawh Forest hian hmana an ropuina ang kha neih let an duh a, Real Betis left back Alex Moreno an dawr mek bawk - Spanish full back hian English club zawm hi a hreh lo.
Kum 29 mi Moreno hian season hman zawh takah khan Real Betis tan inelna hrang hrangah match 45 a khel a, goal nga a khung bakah assist vawi nga a nei bawk.
Betis hian season hman zawh takah khan Copa del Rey nomawi an chawi bawk a, tawnhriat nei ṭha Moreno an lalut thei bawk a nih chuan Forest hi an tawh a khirh khawp ang.
A harsa dawn
Forest hian nipui transfer-ah pound maktaduai 73.5 ngawt an seng tawh a, loan-a an lakluh ber Dean Henderson lah English goalkeeper langsar a ni - an insen dan leh transfer-a an chet dan thlir chuan beiseina a sang hle.
Chutihrual chuan Moreno an lalut leh bawk a nih chuan nipui transfer-ah ringawt player 12 an la tling dawn tihna a ni a, a tawpna a la ni kher lo mai thei bawk.
Coach Steve Cooper tan player heti zat lalut tura club-in a thlawp hi a lawmawm a, chutihrual chuan pressure a sang tel dawn - Coach-in ruahmanna felfai tak neih loh chuan bazar nasat hi chet chhiat bul ṭanna a ni ve thei.