Neeraj Chopra chawl rih dawn

India tlangval chhuanvawr Neeraj Chopra chu malpui hliam vangin a chawl rih dawn, thla khat chhung vel a chawlh a ngaih dawn avangin Birmingham Commonwealth Games-a fei khawh huangah a inlan thei dawn lo - India tan chuan channa lian tak a ni.

Athletics World championships neih zawh takah Neeraj-a hian 88.13m a thui khawh in silver medal a la. Inelna neih zawh takah hian a malpui a hliam a, a tirah chuan CWG a khelh theih a beisei thu a sawi, a hliam endik a nih hnuah erawh a chawlh a ngai tih a chiang ta thung.

Indian Olympic Association secretary general Rajeev Mehta chuan, "Neeraj Chopra-a'n United States aṭangin min rawn bia a, hliam vanga Birmingham 2022 Commonwealth Games a khelh theih loh tur thu chu hreh tak chungin min hrilh," tiin a sawi.

Haryana tlangval Neeraj hi 2019 khan a a kiu hliam vangin a lo chawl reng tawh, tunah Commonwealth Games hmachhawn thei rih lo mah se, inelna lian dang hmachhawn turin a lo kir leh ngei a beiseiawm.

Kum 24 mi Neeraj hian Tokyo Olympic-ah khan India tan gold medal a lo khawh chhuak tawk, athletics huangah India tana Olympic gold medal la thei hmasa ber a ni.