Paul Pogba a inhliam

Juventus chuan an player thar Paul Pogba chuan khup hliam a neih thu an tarlang a, Manchester United aṭanga free transfer-a an lakluh player hliam dinhmun chu enfiah a nih tur thu an sawi.

Italian club hian tukin zing dar 6:00-ah Barcelona nen friendly match an khel dawn a, he inkhelah pawh hian Pogba hi a inlan thei dawn lo - a hliam endik a nih hnuah a chawlh rei zawng tur a hriat chauh ang.

Juventus chuan, "Rei lotêah a hliam endik a ni dawn a, hei vang hian Dallas khawpuia friendly match-ah pawh a kal ve thei dawn lo a ni," tiin an player-in Barcelona a hmachhawn theih loh tur thu an sawi.

Kum 29 mi Pogba hian a khup ding lam na a tih thu a sawi a, hliam a nei tih finfiah a nih hnuah uluk lehzualin a hliam dinhmun hi an en leh dawn a ni.

Juventus hian pre season match-ah Real Madrid chu July 31 khian Los Angeles-ah an hmachhawn ang a, August 7 zanah Atletico Madrid nen Tel Aviv-ah an inkhel leh bawk ang.

Season thara an league match hmasa ber chu August 15 zanah an khel dawn a, Sassuolo an mikhual dawn a ni.