College Veng barakhaih tumtu Leitan Chawhnu dar 1:30-ah ; Chaltlang-Bawngkawn Derby

TṬ Royte Trophy - Inter Branch YMA Football Tourna­ment a hmuhnawm chho zo zel a, vawiin hi champion tura rinkai zinga mi College Veng leh Bawngkawn inlan hun a ni.

Chawhma dar 11:00-ah Be­thlehem Vengthlang hneh­tu Leitanin veteran coach H. Van­lalthlanga enkawlna hnuaia khel College Veng an hmachhawn ang a, NECS Cup finalist Bawngkawn leh an ṭhenawm Chaltlang an inkhel chhunzawm bawk ang.

College Veng - Thar
Leitan ṭhatna ṭhina an sawi chu B. Zoramthara a ni a, tun0ṭumah erawh Thara hi College Veng-ah a insawn tawh avangin a chenna hlui a hmachhawn dawn.

Thara telna College Veng hi Santosh Trophy-a Mizoram champion puitu Thlanga'n a enkawl avangin team thar an ni a. Kum 2003-a CYMA Football finalist hian I League-a Aizawl FC champion puitu R. Laldanmawia, Shillong Lajong midfielder Joseph Lalfakzuala, KC Lalchhuanmawia leh a nau KC Lalruatkima, Mizoram team wing back Ramfangzaua leh a u Edenthara te an kawl a, an goal nawr pawh na tura ngaih a ni.

Tlarhnungah Police defender sang ṭha TC Vanlalhruaia'n a ho a, Chanmari West FC goal­keeper Lalruatpuia an neih avangin Aizawl FC keeper Zothanmawia chu tlarhnung tichak tura hman a ni. College Veng hian chak lohna an nei a nih chuan an tlarhnung a ni a, Leitan an hmachhawn huna siam ṭhat hi coach Thlanga hna hmasa ber tur a ni.

College Veng manager F. Lalhmuchianga chuan, "Team ṭha tak din turin kan thawkrim a, chak tumin Lammual kan pan dawn. Veng mipuite min ṭawiawm tawhnaah kan lawm a, Leitan lakah pawh ṭha taka min rawn ṭawiawm leh turin kan sawm a ni," tiin a sawi.

Dark Horse Leitan
Leitan hi an squad aṭanga thlir chuan last 16 an thleng thei pawh hi result lawmawm a ni a, amaherawhchu Bethlehem Vengthlang hneh thei an nih avangin an thlen chin aṭanga hma sawn zel thei team an ni tih an lantir tawh.

Leitan coach VL Rinpuia chuan, "BVT kan hneh avangin inrintawkna kan ngah phah a, kan infuih phurna ber pawh a ni. College Veng hian hming langsar pawh nei se kan buai phah lo ang. A ṭha pariat zinga inhlangkai ve ngei kan tum a ni," tiin chak ngei a tum thu Vanglaini a hrilh.

NECS Cup 2013 finalist Leitan tan tawnhriat nei ṭha MS Dawngliana (Valpuia) chu chakna thahrui a ni dawn a, goal thum khung tawh V. Lalnunsanga chu College Veng tan ven uluk a ṭul ang. Germany-a inzir mek Ramhlunchhunga'n jersey no. 46 a ha a, ani hi Tuikual North laka chakna goal khungtu a ni a, en bik a sual lo ang.

Leitan boss Rinpuia chuan, "Kan team inlungrualna hi kan inchhuahna neih chhun chu a ni mai a, vengchhung ṭawiawmna ṭha kan mamawh bawk," tiin mipui ṭanpuina rinchhan chhungin hnehna an chan theih a beisei thu a sawi.

Derby a dang ṭhin
Chaltlang leh Bawngkawn inkhel tur hi 'derby' kan ti lo thei lo - ṭhenawm inkhel tur an ni. Chaltlangin goal chhuah loin last 16 an inhlangkai a, Bengaluru FC midfielder Malsawmzuala an chhawr thei tawh ang.

Chaltlang coach Nicky Mal­sawm­tluanga chuan, "Bawng­kawn hi team ṭha an ni a, kil tinah player ṭha an kawl a, an team mil hian player ka rem dawn a ni. Kan tum anga kan khelh chuan hnehna kan chang ang," tiin awmze neia khelh a tum thu a sawi.

CYMA Football-a vawi hnih champion tawh Chaltlang hian player langsar sawi tur an nei meuh lo a, amaherawhchu Aizawl FC junior team coach Nicky hoin Bawngkawn lakah tlawm saa khelh an tum lo.

Bawngkawn lamin coach atan Anand Gurung an hmang a, ani hi Chaltlang FC coach hlui a nih avangin a khingpui tur team a hre chiang. Anand chuan, "Chaltlangin goal an la chhuah lo a, chutihrualin kan nawr reng chuan an lama goal khung hmasa ber tur kan niin ka hria. Kan chak thei turah ka ngai a, kan enkawl tawhte an nih avangin hneh hi ka duh lehzual a ni," tiin Vanglaini a hrilh.

Bawngkawn hian mid­field-ah ball sem thiam pa­hnih R. Malsawmtluanga leh Lal­nuntluanga te an kawl a, Aizawl FC winger H. Lalmuankima leh I League 2nd Division-a Neroca FC champion puitu David Biakzara an nei a, goal hmaa player hlauhawm bik MS Dawngliana an nei. Veteran midfielder Lalremruata'n an veng team hi an la ho thei a, player neih dan aṭanga chhut chuan anni aia ṭha chuang an awm lo.

Ramhlun South leh ITI Veng ten quarterfinal an lut tawh a, vawiina hnehna chang team hnih hian June 13, Thawhlehni chawhma dar 11:00-ah quarterfinal match thumna an khel ang.