Liverpool pan duh Van Dijk
Manchester City, Chelsea leh Liverpool ten lakluh tumim hel mah se Southampton centre-back Virgil van Dijk chuan Anfield pan a duh thu a ti chiang a, Pep Guardiola leh Antonio Conte tan thu hriat nuam a ni hauh lo ang. City bik hian Van Dijk tan sum tam tham sen an inhuam loh avangin an duhthu ngeiin an inhnukdawk nia sawi a awm bawk.
Reds tana buaina tur erawh Dutch defender manah hian Saints-in pound maktaduai 50 lai an beisei a, Merseyside club hian City ang thoin defender manah heti zat an inhuam a rinawm loh avangin Southampton nena inremna nei tur chuan hun an la duh deuhin a rinawm.
Hei mai hi buaina a la ni lo cheu. Liverpool-in an defender an dawr danah Saints an lungawi lo a, an player chu Reds hian phalna nei loin an dawr ru nia ngaiin Premier League hotute hnenah Liverpool hi an hek dawn! Season thara Champions League khel tura inbuatsaih mek Reds hian thuchhuah engmah an la nei lo thung.
Kum 25-a upa defender hian September 2015 khan Celtic aṭangin Saints hi pound maktaduai 13-in a zawm ve chauh a, Southampton hian an hralh a nih chuan Scottish club Celtic hian a hralhna sum 10% an la dawng ve leh dawn. Hetihrual hian season hmasa lawka kum ruk dang cham tura contract thar an ziahpui hi Southampton hian chhuahtir kher an tum lo nia sawi a awm bawk a, player berin Liverpool zawm a duh thu sawi mah se Reds laka an lungawi loh bawk si avangin Saints hian an player hi an chhuahtir kher lo a nih pawhin a mak lo ang.
Netherlands tana vawi 12 inlan tawh defender hian season hman zawh takah khan Southampton tan league match 21 khel hmanin player langsar a ni a, mahse January 22-a Leicester City nen an inhmachhawn ṭuma a inhliam avangin season tawp thleng khan a inlan leh tawh lo.