An mualah Cavs an inringtawk
NBA champion Cleveland Cavaliers tan an nomawi humhim turin insiamṭhat a ngai. Naktuk zing dar 6:30 hian Golden State Warriors chu Finals Game 3 khel turin an mikhual dawn, coach Tyronn Lue chuan thawhhona ṭha an mamawh thu a sawi.
Golden State hian Oracle Arena, Oakland-ah a zawnin Cavs an sawp a, series 2-0 a hmahruai chunga khualmual pan an nih avangin inrintawkna an nei sang khawp ang.
Cleveland hian season hmasa khan 3-1 a an hnufual hnuah hnehna an chang let thei a, NBA Finals bika inlehthalna ropui ber a sawi a ni hial. GSW hian kum hmasa lama an chetsual tawhna ngaiah tluk nawn an duh dawn lo. Cavs hian thawhchhuah an tum bawk - player langsar rual inkhel hi a hmuhnawm ang.
Tyronn Lue-a naute hian Quicken Loans Arena hi an hmangthiam hle. Kumin playoff match nga an khelh tawhah vawi khat chiah chak loh an nei a, an match hnuhnung 16-ah ṭum 14 zet hnehna an chang thei, mikhual tan inkhelh harsatna hmun a ni.
Cavs coach Lue chuan, "Kan beidawng lo a, kan mamawh chu thawhhona ṭha a ni. Tunah hian regular season-a kan buaina defensive bawk kha kan buaina a ni leh tawh, rang takin insiamṭhat kan tum, a rah kan hmuh hman ngei ka beisei," tiin a sawi.
Cleveland tan hnehna chang tur chuan LeBron James leh Kyrie Irving te an inkawp fuh leh a pawimawh dawn, Kevin Love leh Tristan Thompson bakah J.R. Smith ten nidang aia an khelh ṭhat zual a ngai bawk ngei ang.
Season hmasa khan Stephen Curry leh Klay Thompson te awm mah se hun pawimawhah Draymond Green a inhliam. Golden State hian Green awm loh hnuah beisei an phak lo, kuminah erawh harsatna nei loin a khel thei dawn.
Tun lai NBA star langsar awmkhawmna Warriors hian kuminah Kevin Durant an neih belh bawk. American forward hi game hmasa pahnihah khan an team zinga point score hnem ber a ni.
Golden State coach Steve Kerr-a'n nomawi chawi an tum thu a sawi a, chutihrualin hmabak an la ngah thu a sawi tel bawk. Player a nih laia NBA champion vawi nga ni thei Kerr hi kum 2015 khan a hnuzâng zai a ni a, tun hnaiah a natna lang lehin playoff match 11 chhung ngawt a enkawl thei lo.
Assistant coach Mike Brown stepped kaihhruaina hnuaiah Portland, Utah Jazz leh San Antonio Spurs te 4-0 in an hneh vek a, Brown hian Cavs lakah pawh Game 1-ah hnehna a chanpui bawk - Game 2 aṭang chuan Kerr enkawlna hnuaiah an khel leh tawh a ni.