Lawmman Rs 4,50,000/- semna tur Biakliana Memorial MFA Super Cup 2017
Mizoram football-a knock out competition-a pawisa tamna ber tur, Biakliana Memorial Mizoram Football Association Super Cup 2017 kalpui turin MFA leh C Lalbiakliana (L), Zarkawt chhungte chuan nimin khan inremna an ziak fel ta.
Biakliana Trophy MFA Super Cup-ah hian lawmmana pawisa sem zat tur hi Rs 4,50,000/- a ni ang.
He football inelna lian hi June 28, 2017 aṭangin Aizawlah khelh ṭan tur a ni a, MFA/District FA leh Zone FA hnuaia affiliated club tu pawh tel theih a ni ang.
MFA chuan sponsorship pawisa a hmuhte a boa bang awm loin football club tan lawmmanah a pe chhuak vek dawn a ni.
Entry Fee
Entry fee Rs 500 hi MFA Office, City Park-ah June 22 thleng pek theih a ni.
MFA chuan Mizoram chhunga football club zawng zawngte tel theuh turin a sawm a; team tam thei ang berin lawmman an dawn theih dan tur a duang bawk a ni.
Kalphung hmasa
MFA Super Cup hi a ṭantirh lamah chuan MPL champion leh I Day Football/MFA Cup champion te an inel mai ṭhin. Chanmari FC-in Super Cup nomawi kum zawnin an chawi nghal a, kum thumna champion chu Bethlehem Vengthlang FC an ni.
Kum lina aṭangin kalphung thar a piang a, match khat chauh a ni tawh lo. District FA hnuaia club zawng zawng tan tel theih a ni.
MPL club pariatte chu round of 16 aṭangin an khel ṭan a, club dang zawng chu DFA hnuaia first division emaw third division emaw pawh ni se first round aṭang vekin bul an ṭan.
District FA hnuaia affiliated club 58 chu group pariatah ṭhenhran an ni a, MPL club pariat nen team 66 an tel. Final-ah Aizawl FC-in B. Zoramthara goal hmangin Chanmari FC 1-0 in an hneh.
Sum tam zawk awmna Biakliana Trophy MFA Super Cup 2017-ah Mizoram kil tin aṭangin club an inlar dawn e.
Lawmman
Champion Rs 2,00,000
Runners up Rs 80,000
Semi Finalists Rs 20,000
Quarter Finalists Rs 8,000
Round of 16 Rs 4,500
Round of 32 Rs 2,500
Fair Play Rs 10,000
Mimal Lawmman
Best Goalkeeper Rs 3,000 + Trophy
Best Defender Rs 3,000 + Trophy
Best Midfielder Rs 3,000 + Trophy
Best Forward Rs 3,000 + Trophy