Chhinga Veng chak hram Salem Vengin phuba an la

TṬ Royte Trophy - Inter Branch YMA Football Tournament-ah Chhinga Veng leh Salem Vengin last 16 an thleng.

NECS Cup champion Chhinga Veng hian player 10-a khel Aizawl Venglai chu 2-1 in an hneh hram a; player pakhata tlem zawk ni chungin Salem Vengin goal khata Durtlang hnehin phuba an la bawk.

Semifinal luh inchuhin Chhinga Veng leh Salem Veng hi June 12, Thawhṭanni tlai dar 1:30 khian Lammualah an inhmachhawn ang.

Danglamna Mama

Chhinga Veng hi rinkai ni chungin khel­mualah inlan mah se an veng ṭhenawm Aizawl Venglai lakah an chungnung thei lo a, nimin inkhel hmasa zawk hi khua a lum bawk avangin a hmuhnawm tawk lo.

Second half-ah Chhinga Vengin S. Malsawmtluanga an luhtir a, Mama luh hnuah MPL club nei veng inkhel a nung sawt.

Minute 70-naah Ramhlun North FC midfielder Lalchhuanpuia'n Aizawl Venglai defender Lalrinzuala Khiangte handball vanga an freekick hmuh chu Chhinga Veng hmahruaina ni turin a pet goal nalh hle. Aizawl FC keeper Lalawmpuia tan pawh dan ngaihna a awm lo.

Chhinga Veng dinhmun ṭhatna belh­chhah turin Aizawl Venglai winger F. Zosang­liana chu hnawh­chhuah a ni a, he ti chung hian player 10-a khel Laltuakliana hote an zam phah lo. Minute 81-naah PL Biaksanga freekick pet chu Chhinga Veng keeper C. Sang­tluanga'n chhut sualin a goal.

Aizawl Venglai lamin goal dang khung belh tumin minute 86-naah Lalramnghaka an luhtir a, goal khung theihna chance ṭha a rawn siam nghal bawk. Amaherawhchu player tlem zawk ni chunga goal khung belh an tum avangin an tlarhnung a nghing a, Chhinga Veng defender K. Lalthlahlova ball petin Rinzuala kut a per a, referee-in penalty spot a kawk. Injury time-ah Zomuanpuia'n cool takin penalty aṭangin NECS Cup champion chakna goal a khung.

Phuba an la ta

Salem Veng-in Durtlang an la hneh ngai lo a, kumin hi an kim ber ṭum a nih avangin chak ngei an inring a, Lammualah phuba la ta ngei mah se an beisei ang ngawta awlsam erawh a ni lo.

Durtlang lamin midfield-ah Ricky Lallawm­awma an kawl a, tlarhmaah Lalliansanga (Notea) leh Lalruatfela te an kawl avangin counter attack-ah an hlauhawm. Chutihrualin last 16 boruak sangah team pahnihin an theihna tak an pholang chhuak zo lo.

First half tawp hma minute hnih la awmah Salem Veng defender Lalawmpuia chu Notea tlan chak vangin a buai a, Durtlang forward laka ball a hloh hnuah a tihtluk zui avangin red card pek a ni. Player pakhata an tlem avangin Salem Veng chu rinkai an ni tawh lo.

Second half-ah Durtlang goal nawr a na zawk a, amaherawhchu an chance neih ṭhat ber Vanlalnunpuia'n a khung lo a, an vanneih ṭum a ni lo. Minute 72-naah Salem Vengin goal theihna tur nia lang lo aṭangin freekick an hmu a, Mizoram junior team midfielder Ṭhapuia'n ball ṭha bik vawrh lutin David Lalchhuanawma'n a tauh per hnuah B. Zosangliana'n awlsam takin a khung.

Durtlang lamin an siphurh sut an tum a, amaherawhchu khelh hmabak minute 18 chhungin goal hmaah Salem Veng an hlauhawm zawk. Daniel Lalhruaitluanga'n freekick aṭang bawkin crossbar a pet per a, goal lo mah se goal dang lut tawh loin Salem Veng 1-0 in an chak.

Nimin Inkhel Results
Aizawl Venglai 1 - 2 Chhinga Veng
AIZ : PL Biaksanga 81'
CHH : Lalchhuanpuia 70'; C Zomuanpuia 90+2' (P)
Durtlang 0 - 1 Salem Veng
SAL : B. Zosangliana 72'
Quarterfinal
June 12, Thawhṭanni
11:00 AM ITI Veng Vs Ramhlun South
01:30 PM Chhinga Veng Vs Salem Veng