Andy Murray tak kan hmu ta

French Open round hmasa lamah Andy Murray-a'n beisei a phak lo a, a chak hram zel. Last 16 khelh a nih meuh chuan British player Murray-a'n a theihna tak tak a pholang ta. Thawhṭanni zan khan world number 1 hian quarterfinal lut turin Karen Khachanov a sawp.

Philippe Chartier Court-a inkhelah Murray hian darkar hnih leh minute li chhungin Russian rawlthar lakah 6-3, 6-4, 6-4 in hnehna a chang. Murray hian ATP Tour-ah match 650 hnehna a chang tling ta chiah. Roland Garros-ah hian tun hnai kum li chhung bik chu last 16 a paltlang vek a, quarterfinal vawi sarih a luhna chiah a ni.

Kum 30-a upa Murray chuan, "Kumin Roland Garros bikah chuan ka khelh ṭhat ber ṭum a ni hial ang. Nitin hma ka sawn zel a, ka ball vuak a dik tawhin ka service pawh a na leh tawh hle. Unforced errors nei tlem zel tura ka inbuatsaih a ngai," tiin tun hnai ni 10 chhungin hma a sawn chak hlein a hriat thu a sawi.

Grand Slam vawi thum champion tawh Murray hian round hmasa zawkah Juan Martin del Potro a hneh tawh bawk, champion tura rinkai zinga mi a hneh hnuah inrintawkna a neih belh tih a hriat theih. Kum 1935 khan Fred Perry-a'n French Open nomawi hi a chawi a, hemi hnuah British player hlawhtling an la awm leh lo - Murray hian nikum khan final a lut a, khatih laia world number 1 Novak Djokovic a hneh lo.

Murray hian an match hmasa pahnihah set a hloh a, Del Potro leh Khachanov hneh tur erawhin set a hloh tawh lo. Khachanov lakah hian a service hmasa a dik loh ṭum pawhin a hnuhnung zawkah point sarih chiah a hloh a, a dar na vanga harsatna a neih kha a bo tawh.

Last 16 inkhel pakhat zawkah Kei Nishikori-a'n set hmasa berah game khatmah la lo mah se set thum a lak zawn theih avangin Fernando Verdasco chu 0-6, 6-4, 6-4, 6-0 in a lehthal. Japan tlangval hian quarterfinal-ah Britain fa chuam Murray a hmachhawn ang.

Seeded pariatna Nishikori hian set hmasa berah point 13 chiah a hlawh chhuak a, chak lo chiang tura rin a ni hman. Mahse, set hnih a lak hnuah set hnuhnung ber la turin minute 22 chiah a mamawh, game a hloh miah lo bawk!

Nishikori chuan, "Khatiang khawpa bul ka ṭan fuh loh avang khan thil thlakthleng ngai a awm tih ka hria. Thihsual ka neih lohna turin ka fimkhur zual hle, engtiangin nge set thum kha a zawna ka lak mai theih tih ka hre lo hial. A ṭha thei ang berin ka khel chhuak a ni," a ti.

Monfils hnehtu Stan

Jo-Wilfried Tsonga tlak hnuah Gael Monfils chu khawtual miten mipa singles player zinga an beiseina neih chhun a ni. Philippe Chatrier Court-ah seeded 15-na Monfils hian fans puihna hmu ṭha viau mah se Stan Wawrinka lakah a ding tlang zo lo.

Thli thawin a tihbuai deuh inkhelah Grand Slam vawi thum champion tawh Wawrinka hian darkar hnih leh minute 43 chhungin 7-5, 7-6(7), 6-2 in hnehna a chang. French Open-ah hian kum 1983 hnulamah khawtual tlangval champion thei an la awm leh lo a, kuminah pawh an champion leh dawn ta lo a ni.

Swiss star Wawrinka hian quarterfinal-ah Marin Cilic a hmachhawn leh ang. US Open champion hlui Cilic hi Kevin Anderson nen last 16 an inkhel tur an ni. Mahse, South African star Anderson hi hliam vangin a inlan thei lo, inkhelh hah ngai loin Cilic a tlang.