Real Madrid defender Pepe a chhuak dawn

Real Madrid defender Pepe chuan La Liga champion a chuahsan tur thu a tichiang. Kum 34-a upa Pepe hian Premier League club zingah amah ngaihventu an awm thu a sawi bawk.

Porto aṭanga Real Madrid zawmtu hian Santiago Bernabeu-ah kum 10 hun a hman chhungin inelna hrang hrangah match 334 a khel a, La Liga leh Champions League nomawi pathum ve ve a chawi hman.

Portugal international hi tun season-ah Zinedine Zidane-a'n a chhawr rim lo, league match 13 chiah khelhtir in Champions League lamah pawh ṭum thum bak a inlan lo.

Pepe chuan, "Tumah ka dem lo. Mahse, hriatthiam loh erawh ka nei. Zidane leh Real Madrid hian ka awmdan tur an hriat lawk avangin an hnenah in mangṭhana thu pawh ka sawi lo, tunah chuan ka hun a liam a, thil thar a lo thleng ang," tiin a chhuah tur thu a sawi chiang.

Euro 2016-a Portugal champion puitu chuan sawi chhunzawmin, "England aṭangin sawmna ka dawng, mahse engmah thil chiang a la awm lo," a ti. Pepe hi Ligue 1 club Paris Saint-Ger­main pawhin an ngaihven nia sawi a ni.