Arsenal player thar Kolasinac

Arsenal chuan Schalke aṭangin defender Sead Kolasinac chu kum nga chhung atan free transfer-in an lalut. Feet ruka sang Kolasinac hi tun nipui laia Arsene Wenger-a player lakluh hmasak ber a ni.

Kum 23-a upa Kolasinac hi left back ni mah se a laiah pawh a hman theih. Gunners manager Wenger-a'n season tawp lama a hman thiam 3-4-3 formation a hmang zui dawn a nih chuan wing back atana chhawr theih tur a ni ang.

July 1 aṭangin nipui transfer a inṭan dawn chauh a, Arsenal an che rang hle. North London club chuan thuchhuah siamin, "Inremna neih a ni tawh a, Kolasinac hian July aṭangin team training a zawm ang," an ti.

Schalke aṭanga senior career ṭantu Kolasinac hi kum bithliah inelna lamah chuan Germany tan a khel ṭhin a, senior level-ah erawh Bosnia and Herzegovina tan inlanin match 18 a khel tawh.

A contract rei zawng hi Schalke thuchhuah aṭangin a hriat theih, Bundesliga club chuan, "Kolasinac hian kum 2022 thleng daih a club tan hian contract a ziak a, kan hnena kum ruk chhung a theihna zawng zawng a hlah avangin a chungah kan lawm a, a kal zelna turah duhsakna kan hlan a ni," an ti.

Schalke head coach Jens Keller chuan, "Kolasinac hi tharum ngah, huaisen leh khelmual chhunga rilru fim hmang ṭhin. Player mal leh mala a hmachhawn tawh chhuah ngai lo," tiin a fak tawh, tharum hman hnemna Premier League lamah a theihna fiahin a awm dawn.