Magpies player hlui Cheick Tiote a thi

Newcastle United midfielder hlui Cheick Tiote chu Thawhṭannin khan China-ah training session an neih laiin a tlu a, damdawi ina hruai a nih hnuah a thi tih puan a ni.

Kum 30-a upa Tiote hian January khan Magpies aṭangin China League One club Beijing Enterprise a zawm a, China a pan hma hian Newcastle-ah kum sarih hun hmangin match 150 chuang a inlan sak.

Tiote thupuangtu Emanuele Palladino chuan, "Hrehawm ti tak chungin Cheick Tiote chu training session-ah a tluk hnuin a thi tih kan puang a, he hun harsa takah hian a chhungte tibuai lo turin kan in ngen a ni," a ti.

Tu nge Tiote?

Feet 5 leh inches 11-a sang Tiote hian Belgian club ṭha Anderlecht-ah a career a ṭan a, kum thum a khelh chhungin season khat chu Dutch club Roda JC-ah a khel. Kum 2008 khan Dutch club tho FC Twente a pan a, season hnih hun a hman chhungin league nomawi vawi khat a chawi bakah Dutch Super Cup a chawi bawk.

August 26, 2010-ah khan Newcastle United a pan a, kumin January thleng kha chuan Magpies player a ni. Newcastle tan inelna hrang hrangah match 156 zet a inlan sak a, nomawi chawi erawh a nei lo thung.

Ivory Coast tan vawi 51 inlanin goal khat a khung a, kum 2015-a Africa Cup of Nations an chawi ṭum khan squad-ah a tel phak. Kumina China lam a pan hnuah Bijing Enterprise tan match 11 a inlan hman a, tunah erawh thlah liam a ni ta.

Mangṭha 'Nuimawi'

Magpies boss hlui Steve McCla­ren chuan football khaw­vela nui mawi ber Tiote thlah a ngai ta mai chu hriatthiam har a tih thu a sawi. English manager chuan, "Newcastle ka enkawl lai khan Papiss Cisse leh Cheick te hlim taka an nui a nih chuan khawvel hi a hlimawm a ni tih ka hre

ṭhin a, team zawng zawngin an squad-a awm tura an duh tur chi player a ni," tiin a fak.

Twente leh Magpies-a Tiote lo enkawl tawhtu McClaren chuan sawi chhunzawmin, "Twente-ah player naupang tak a nih laiin ka hmelhriat tawh a, player ka hmuh tawh azawnga tawh khirh ber a ni. Khelmual leh training-na hmun thlengin hnehna chan a duh zel a, a hmaa player awm tawh chu tackle leh pet lohin a chhuah ngai lo," a ti!

"Tiote hian a chhungte a chawm a ngaih avangin football khelh hi nuam a ti em em a, a chhungte zawng zawng hi amahah an innghat tawp mai a ni," tiin a player kal liam chu 'hun' lo a ti hle.

Hriatrengna goal

Tiote-a'n Magpies tan match 156 a khelh chhungin vawi khat chiah a pet goal a, a goal khung chhun erawh Magpies chanchina hriatreng tawh tur a ni. February 5, 2011 khan Premier League match-ah Magpies leh Arsenal an inkhel a, Gunners hian minute 26 chhungin 4-0 in hma an hruai.

Second half-ah Newcastle-in comeback ropui an lantir a, an si phurh an sut fai vek! Tiote hian minute 87-naah an si phurh sut zawhna goal a khung a, yard 20 vela hla aṭangin kawh pawtin a pet goal.

Hetih hunlaia Magpies manager Alan Pardew chuan, "Cheick-a goal ropui kha tuman kan theihnghilh thei lo a, Premier League chanchin ziaknaah a tel ve reng tawh ang. Newcastle player ni tura ka duh ang zawng zawng chu amahah khan a awm vek a ni. Cheick Tiote hi midfield a roreltu, enkawl nuam ka tih em em ang khan ka hre reng ang. Chawl hahdam rawh ka ṭhian," a ti.

Mangṭha mai le

Newcastle manager Rafa Benitez chuan, "Professional dik tak, theihna zawng zawng pe ṭhin a ni a, chung zawng zawng chungah chuan pa ropui tak a ni," tiin a player hlui a thlah a, Manchester City captain leh Anderlecht-a Tiote khelhpui ṭhin Vincent Kompany chuan, "Sawi tur ka van a, hrehawm ka ti takzet. Ka teammate neih tawh zinga fel leh player thawkrim ber pawl a ni a, chawl hahdam ang che ka ṭhian," tiin a thlah ve bawk.

Magpies keeper hlui Shay Given chuan, "Min barakhaih takzet a, a chhungte leh ṭhiante Pathianin awmpui rawh se. A la hma mah mah chu a ni," a ti a, Magpies-a Tiote khelhpui ṭhin Papiss Cisse chuan, "Muttui le ka ṭhian, kan ngai dawn khawp mai che. A chhungte ka tawrhpui a, iva liam hma si em," tiin a thlah.

"Cheick a chanchin chuan min va ṭhawng em. Ka team­mate zinga ka ngainat ber pawl a ni asin. A chhungte kan hre reng e," tiin Magpies keeper Tim Krul chuan a thlah thung.