Semifinal luh tum Ramhlun hmaah Hunthar

GIG Motors Pro Volleyball League khelh mekah league round an khel zo dawn hnai a, semifinal khelh beiseina an la nei vek. Zanin dar 8:00 hian R. Dengṭhuama Indoor Stadium, Mualpuiah Ram­hlun Sporting Club leh Hunthar te an inhmachhawn dawn, inkhel en man a awm lo.

Ramhlun hian match hnih khel tawhin point thum an hmu a, league table-ah pathumna an ni. An chung chiaha awm Hunthar hian match khata khel tam zawk chungin point li an hmu thung. Table hnuai lama awm TNT leh 3rd MAP ten beisei an la neih ve avangin inthlahdah a thiang lo ang.

Team pahnih khaikhinin an player-te an intluk tawk hle, state pawn aṭangin mi pahnih ve ve chhawrin an ṭhatpui tih kan hmu tawh. Chutihlaiin Huntharin Mizo player an nei ṭha zawka ngaih a ni.

Hunthar tan an league match hnuhnung ber tur a ni a, an chak a nih chuan semifinal an lut dawn. Set hnih hloh lova point thum an hmu a nih phei chuan team panga inel zinga league-a sang ber emaw a dawttu emaw an ni thei dawn a ni.

Hunthar tan Sarang S Lal a pawimawh leh dawn, feet 6 leh inches 5-a sang Sarang hian MAP lakah point 27 hmuin LG D3 Player of the Night trophy a dawng. Chhinga Veng leh TNT an khelh ṭuma che ṭha tak Santosh Kodakkal chuan point 33 hmu mah se tihsual a ngah a, point 22 a hloh ve thung a, a tlahniam - zaninah insiamṭhat a tum ang.

RSC lamin league match vawi hnih an khel tawh a, khelh hmabak pahnih an la nei. An inlan hmasak berah set la lovin Chhinga Veng lakah an tlawm nghal a, a hnuah TNT nen intumin harhtharna ropui tak an chang a, 3-0 in an chak.

Point thum kawl sa chunga Hunthar an hmachhawn dawn avangin set hnih hloh lova an chak a nih chuan semifinal an lut dawn a, tun dinhmunah inrintawkna leh beiseina an nei sang hle a ni.

RSC hian Chhinga Veng hmaah state pawn player pakhat Suresh Chandra Khoiwal Vicky chauh an hmang. TNT nen an inkhelh tumin Vicky bakah Kerala Police aṭanga an lak VP Hafeel an hmang thei a, an ṭhatpuiin hma an sawn phah hle - zaninah pawh anni pahnih hi player pawimawh an ni ang.