India tan Jeje a vul leh ta

Mizo tlangval Jeje Lalpek­hlua'n India tan goal a khung leh ta - Thawhlehni zan khan India chuan friendly match-ah 2-0 in Nepal an hneh a, Jeje-a'n Sandesh Jhingan-a goal khung tur a siam sak bakah goal hnihna a khung ve leh bawk.

Hnahthial tlangval Jeje-a goal khung piah lamah Mizote tan chanchin lawmawm dang hriat tur a awm - Bethlehem Veng rawlthar Jerry Lalrinzuala chu India tana a match hmasa ber khelhtir a ni a, Daniel Lalhlimpuia a inlan bawk. Player pahnih hi second half-ah tlan luhtir an ni.

Mizoram Sniper
Indian football legend Bhai­chung Bhutia kha a finishing tawih em avangin 'The Sikkimese Sniper' tia koh ṭhin a ni a, Bury FC striker hlui hnua Indian media ten sniper hminglem an pek leh hmasak ber chu Mizo tlangval Jeje a ni - Hnahthial tlangval hi 'The Mizoram Sniper' tia koh a ni ṭhin.

Chennaiyin FC striker hian India tan match 44 a khelh tawhah goal 18 a khung tawh a, heng zinga a goal khung 10 hi ram tana a match hnuhnung 11 aṭanga a khung a ni. Jeje-a'n India tana a match hnuhnung 11-ah hian Iran, Turkmenistan leh Myanmar an hmachhawn ṭumin goal a khung lo a, Bhutan nena an inkhela a goal khung hi unofficial match a nih bawk avangin a pumpuia a goal khung 18-ah chhiar tel a ni lo.

India tan Jerry
Season hmasa lawkah Chen­naiyin FC tan Jerry Lalrin­zuala-a'n a professional match a khel ṭan ve chauh a, tunah erawh India international a ni ta. Farkawn khaw chhuak rawlthar hian ISL-ah Emerging player of the league chawimawina a dawng a, I League lamah sawmtu tam tak nei mah se hmun chan tam theihna tura rin DSK Shivajians a pan.

British coach Dave Rogers enkawlna hnuaiah Jerry-a'n ISL-a a chet ṭhat a chhawm nung a, season a tawp meuh chuan Emerging Player of Hero I League-ah thlan a ni leh bawk. India coach Stephen Constantine-a'n Jerry a hmuh hmaih lo, March thla khan Cambodia leh Myanmar hmachhawn tur squad-ah a telh tawh a, a vawi hnihna atan ko lehin India tan a inlan ta - bul ṭanna chauh a la ni.

Beiseiawm Daniel
Serchhip rawlthar Daniel Lalhlimpuia'n Bengaluru-a Albert Roca enkawlna hnuaiah inkhelhna hmun a chang phak fo a, Mizo striker pasang thiamna hi India-in a hai lo. India U19 captain hlui hi minute 46-naah tlan luhtir niin ram tan match li lai a khel tling ta.

Nepal nena inkhel India squad-ah hian Aizawl FC defender Lalruatthara leh Shillong Lajong midfielder Isaac Vanmalsawma te an awm bawk a, anni pahnih hian bench lamah hun an hmang tluan thung. India hian June 13 khian AFC Asian Cup Qualifier-ah Kyrgyzstan an hmachhawn leh ang.