Republic Veng hmaah Hualngohmun Mipui hmuh châk Chanmari Vs Republic VT

TṬ Royte Trophy - Inter Branch YMA Football Tournament last 16 chu vawiin hian khelh zawh a ni dawn a, inkhel thiam veng pariat a hriat ang. Last 16 thleng tura goal khung tam ber Republic Vengin Aizawl khaw pawn aṭanga dam awmchhun Hualngohmun an hmachhawn ang a, ngaihven hlawh inkhel erawh chawhnu dar 1:30-a Chanmari leh Republic Vengthlang inkhel tur a ni.

Republic Day

Aizawl South lamah CYMA Football-a nomawi chawi tawh awmchhun Republic Veng an ni a, kum 2005 khan a vawi khatna atan an champion. Hemi hma chiah kum hian Inter Village Football Tournament-ah Republic Veng hian nomawi an chawi bawk avangin kum 10 chuang liam ta kha an vanglai hun a ni.

Republic Vengin kum 2008-ah final lut leh mah se Ramhlun South lakah an chak lo a, hmasawn lam aiin tlakhniam lam an pan, an veng aṭanga indang Republic Vengthlang pawh team langsar zingah an invawrh thei bik lo.

Kumin inelna erawh Republic Veng tan hun duhawm a ni a, Repub­lic Vengthlang nen last 16 an lut ve ve a, vawiina hnehna an chang ve ve a nih chuan inelna lian thamah a vawi khat nan Republic Derby hmuh tur a awm ang.

Hualngohmun an ṭangrual

Hualngohmun-in NECS Cup-a an match hmasa berah Republic Veng 3-0 in an hneh lo a, hemi ṭum hian Mizoram defender Lalhmunmawia leh Chhinga Veng FC midfielder Vanlalthanga te an chhawr lo. Tun ṭumah hian player ṭha pahnih bakah goalkeeper Lalremtluanga ten an belh a, practice-na ṭha zawk nen NECS Cup aiin an ṭha tawh zawk. Midfield-ah Mizoram Police midfielder Lalramtharmawia an kawl bawk a, Republic Veng laka zam tur an ni lo.

Amaherawhchu, Hualngohmun tana chanchin lawmawm lo chu an player pathum hrem vangin an khel thei dawn lo. Team manager David Vanlalthlana chuan, "Player pathum awm lo hi kan buai phah lo ang. Kan ṭhatna ber chu kan ṭanrualna a ni a, tun ṭumah hian kan thawhhona a ṭha hle. Nu ho pawhin team tan chawhlui tui tak min siam tawh a, mi tlawmngaiten pawisa an thawh khawm a, kan jersey hi kan VC te min lei sak a ni," tiin Vanglaini a hrilh a, Hualngohmun football team ṭawiawm turin khawtlang mipui a sawm nghal bawk.

Republic Veng hun?

Republic Vengin last 16 lut turin goal 26 an khung a, goal khat chiah an chhuah. An striker chhuanvawr F. Lalrinpuia'n match tinah goal a la khung vek a, goal khung tam ber Zo United forward hlui Lalruatfela'n goal kua a khung tawh a. MPL5 best midfielder nominee-a tel pha captain K. Lalnunzama'n midfield a ho a, tlarhnungah Mizoram junior team goalkeeper RS Lallawmzuala leh defender Lalmuanawma te an kawl a, kum lamah naupang mah se talent nei ṭha an tam zawk avangin chak tura rinkai zawk an ni.

Republic Veng manager F. Zorin­puia chuan, "Team thawhhona a ṭha a, kan hruaitute kan hnungah an ding tlat, khawtlang mipuiin min ṭawiawm ṭha bawk. Khelmuala inlan te, technical area-a awm te leh mipui ṭhutna lama ṭhu ten Republic Veng tan theihtawp kan chhuah ang," tiin an theihna zawng zawng nena an khelh tur thu a sawi.

Ngaihven hlawh chu

MPL-a coach tawnhriat ngah Chawngthansanga'n Chanmari veng hi CYMA Football vawi hnih a enkawlna a ni a, NECS Cup-ah vawi khat a enkawl tawh bawk a, tun ṭum hi Chawnga'n chhawr theih tura player an ṭhat ber ṭum a ni. Tlarhmaah Jerry Mawihmingthanga a awm a, DSK Shivajians forward hi thlawp turin club tana a khelhpui Lalhriatpuia leh Chanmari fapa rangkachak Ro­chhingpuia te an awm. Goal nawr kawnga forward ṭha Jerry kawppui turin Rosangliana, Lalnunzama leh Mi­chael Lalhruaitluanga te an awm bawk.

Chanmari hian Armed Veng an hneh thei a, champion lai hneh tur hian tlarhnunga ding Mizoram captain Lalrinchhana leh C. Lal­muan­awma te an thawh hlawk. Field sir lama awm tur pawhin Aizawl FC defender Lalhriatrenga (Achia) a la nei a, keeper MS Dawng­­liana an neih bawk avangin sut tlang harsa ber tur zinga mi an ni.

Republic Vengthlangin cham­pion rinkai ni phak Khawzawl Jt YMA an hneh thei a, Mizoram coach Lalsangzuala Hmar-in a ho bawk avangin an inringtawk hle. RVT hian MPL-a player langsar ni phak keeper Lalmuanawma, defender H. Lalhlimpuia, C. Lalrosanga leh C. Lallawmzuala bakah tlarhmaah Lalruatfela Zote te an kawl. Veteran forward Joseph Lalrinmawia leh Vanlal­fela ten an la ho a, rawlthar duhawm K. Lalhmangaihkima te an nei bawk.

Player nei ṭha pahnih inkhel tur hi neurtral supporter tan pawh en man hla tham a ni dawn a, chak tura rinkai zawk pawh an awm lo.

An inhlau lo

Chanmari coach Chawngthan­sanga chuan, "Republic Vengthlang hi team ṭha tak an ni a, amaherawhchu champion kan tum a nih chuan kan khingpui apiang kan hneh a ṭul a ni. Kumin hi ka hnuaia Chanmari veng player-te kim ber ṭum a ni a, kei leh ka player-te hian Chanmari tan theihtawp chhuah kan tum a ni," tiin hnehna chan ngei an tum thu a sawi.

Chawnga chuan sawi chhun­zawmin, "Zing lama kan inkhelh pawhin ṭawiawmtu kan nei ṭha a, tlai lamah phei chuan ṭantu kan ngah lehzual ang. Chanmari hian football an tui a, an veng team hi inkhel pawimawh an hlamchhiah lo ang," tiin inkhel en turin Chanmari mipui a sawm.

Republic Vengthlang assistant coach Vanlalliansanga chuan, "Player ṭha leh coach tawnhriat nei ṭha an nei a, tawh an khirh dawn. Chutihrualin he team khingpha tur hian kan player-te hi an ṭha tawk a, kan inbei tawk khawp ang," tiin Vanglaini a hrilh.

RVT manager C. Lalmuana chuan, "Team ṭha tak din turin khaw­tlang mipui kan ṭangrual a, Chanmari kan hmachhawn hunah pawh hian kan ṭanrual zia lantir kan tum a ni," tiin hnehna auh chhuah ngei an tum thu a sawi.

Republic Vengthlang pachal Mamuana hi kum 2004-a Mizoramin Lammuala Under 16 an champion ṭuma mipui chawk phurtute zinga mi kha a ni a, khatih lai khan au rual pawl awm se nei dinin Mizoram ṭantute awmze neia an au rual theihna kawngah mi pawimawh a ni.