Champion lai Djokovic a tla
French Open champion lai Novak Djokovic chu nimin tlai khan seeded palina Dominic Thiem-a'n quarterfinal avangin a vaw tla. Serbian tlangval hi 6-7, 3-6, 0-6 in a chak lo. Thiem hian semifinal-ah he hmuna nomawi vawi kua ngawt chawi tawh Rafael Nadal a hmachhawn ang.
Thawhlehni zana inkhel tura ruahman chu ruah surin a tihbuai avangin nimin tlai khan khelh a ni. Suzanne Lenglen Court-ah seeded pahnihna Djokovic-a'n bul a ṭan fuh lo a, set thum an khelh chhungin a tho chhuak thei tawh lo. Set hmasa berah chauh pawh unforced error vawi 17 zet a nei!
Tun season-a beisei phak lo Djokovic hian darkar hnih leh minute 15 an inkhelh chhungin unforced error vawi 35 a nei tling a, winners vawi 18 chiah a vuak theih bawk avangin world number 2 hi Thiem lakah a mualpho chiang hle.
Austrian star Thiem hian French Open inbuatsaih nana an hman Italian Open-ah Djokovic hnehin nomawi a chawi tawh a, hemi ṭum hian semifinal-ah Nadal a hneh bawk. Tun season clay court-a Nadal hneh thei awmchhun a la ni!
World number 7 Thiem chuan, "Ka tan chuan a makin a ropui hle, nidang aiin khua a vawtin thli a thaw nasa zawk a, boruak danglam tak karah ka ball vuak a fuh ṭhin em avangin ka vannei a ni," a ti. Thiem hian winners vawi 38 neiin a ball vuak nat leh service ṭhat a chhawr ṭangkai hle a ni.
Nadal nge nge...
Rafael Nadal chuan Pablo Carreno Busta hnehin French Open semifinal a inhlang kai. Nadal hian 6-2, 2-0 a hma a hruai laiin a khingpui hi pum na vangin a inkhel zui thei lo a ni.
Philippe Chatrier Court-a inkhelah Nadal hian service hmasain a la nghal a, Busta service a chhuhsak zui nghal zat bawk. Court chhungah minute 51 hun a hman chungin Spain tlangval hian harsatna a tawk lo a, double fault a nei miah lo.
Kum 31-a upa Nadal tan inkhelh hah lutuk ngai loa semifinal luh hi chanchin ṭha a ni. Roland Garros-ah hian a champion a nih chuan Open Era chinah Grand Slam pakhata vawi 10 champion thei hmasa ber a ni ang
Kumin French Open-ah Nadal hian semifinal lut turin match nga a khelh tawhah set a la hloh lo a, game 22 chiah la hloh bawkin kum 2008-a match nga chhunga game 25 a hloh record chu a rawn khum tawh a ni.