Inrinniah Gixxer Cup

Mizoram Motorsports Association (MiMSA) leh JK Tyres, Suzuki India Ltd. te ṭangkawpin an buatsaih tur Gixxer Cup chu June 10, Inrinni hian Tuirial Airfield-ah neih a ni dawn.

Inelna hi India ram huap a neih tur a ni - Eastern, Western, Northern leh Southern Zone-ah te ṭhendarh niin Mizoramin a thlen tur hi Eastern Zone selection round a ni. Southern Zone selection (Bengaluru), Northern Zone (Noida) leh Western Zone (Pune) neih a ni bawk ang.

Mizoram-in a thlen turah hian kum 12-16 inkar tan Road To Rookie Cup hi duan a ni a. India ram pum huapa intlansiak a tel leh tur hian rider 17 thlanchhuah tur an ni. Gixxer Cup bik hi chu hi kum 17 chin chunglam tana duan niin ram pum huapa tlan tur 30 thlanchhuah a ni ang.

Rider thlanchhuah te hian, rampum huap intlansiakna vawin thum an hmachhawn hnuah a tiṭha zual te chu Spain-ah RedBull Rookie Cup qualifying tlan tura thawnchhuah an ni leh ang. Spain-ah qualifying round hi an paltlang thei hlauh a nih chuan Red Bull Rookie Cup an tlan thei dawn a ni.

Inelna tinah hian lawmman ṭha tawk tak a awm zel dawn a, kum tawp season champion chuan Suzuki bike Gixxer SF Fi an hlawh dawn. Pahnihna leh pathumna thleng hian Suzuki Gixxer Naked bike leh Suzuki Lets scooter an dawng dawn a ni.

Gixxer Cup a tel tur tan valid driving licence leh passport photo a ngai dawn a, Road To Rookie Cup a tel tur tan nu leh pa phalna lehkha leh passport size photo a ngai ang. Tel tur zawng zawng ten entry fee Rs. 500 ken tel theuh tur a ni a, fullface helmet, glove leh ngalrek khuh pheikhawk bun ṭheuh tur a ni.

Tel turte tan Jktyremotorsport.com/blazetofame/-ah online registration tih theih a ni a. Inrinni hian a hmunah entry hawn a ni bawk ang. Bike hi a hmunah hman mai tur Suzuki Gixxer bike an rawn keng dawn a, mahni bike hman theih a ni dawn lo a ni.