Chaltlangin Bawngkawn barakhaih College Veng dal thei an awm lo

Bawngkawnin a vawi khat nana CYMA Football champion an tumna chu an ṭhenawm Chal­­tlangin an tihtawp sak a, TṬ ­Royte Trophy - Inter Branch YMA Football Tournament last 16-ah a vawi khat nan 'upset' a thleng.

Nimin khan Lammualah match hnih chauh khelh ni mah se goal 13 tehmeuh a lut. College Vengin 4-2 in Leitan an hneh a, Aizawl North Derby-ah Chaltlangin 4-3 in Bawngkawn an lehthal. College Veng leh Chaltlang hi quarterfinal-ah an inhmachhawn ang.

Harsatna awm lo

Leitan-in bul an ṭan fuh lo a, Ricky Rohmingliana'n minute hnihna leka an lama goal a khung avagngin College Veng dinhmun a ṭha. Veteran coach H. Vanlalthlanga hote goal hmaah an hriam a, Aizawl FC keeper Zothanmawia'n veng tana defender hna a chelh hnua a goal hmasa ber a khung a, Edenthara'n College Veng goal thumna a khung a - minute 16 chiah a la ral.

Leitan beiseina siam turin Lalremliana'n minute 33-naah khung mah se second half-ah College Vengin R. Laldanmawia hmangin goal lina an khung. Leitanin huaisen takin an khel a, minute 76-naa MS Dawngliana goal chu scoreline tih mawina chauh a ni. College Veng an chak awlsam a, an tlarhnung erawh a phui lo - match hnuhnung pahnihah goal li an chhuah.

Chaltlang an huaisen

Bawngkawnin player ṭha an kawl hnem a, Lalhmunsiama hmangin minute 10-na lekah Chaltlang lamah goal an khung a, darkar chanve hnuah captain H. Lalmuankima'n goal hnihna a khung leh bawk.

Chaltlang beiseina chhi nung turin Malsawmzuala a rawn inlar a, Bengaluru mid­fielder ball fing zet chu PC Lalhriatpuia'n penalty hlawhchhuah nan a hmang. Minute 42-naah Sawmtea'n penalty a khung a, minute thum hnuah Aizawl FC Acade­my forward Hriatpuia'n Bawngkawn defender tihsual zarah a finishing ṭhat zia pholangin chiang zetin a an siphurh a sut.

Second half-ah erawh team ṭha zawk Bawngkawn bawkin bul an ṭan ṭha a, MS Dawngliana'n minute 60-naah offside trap bumin goal thumna a khung. Chak tura rinkai zawk Bawngkawnin inkhel thunun mah se Chaltlangin Hriatpuia hmang bawkin an siphurh an sut.

Bawngkawnin chak tumin Neroca winger David Biakzara an luhtir a, an goal nawr a na sawt. Amaherawhchu pressure sangah Dawngtea ten chakna goal khung an harsat a, an tlarhnung an rem phui thei lo bawk. Benglaluru FC mid­fiel­der Sawmtea ball pet chu Bawngkawn keeper MC Lalneih­sanga'n chhut sualin Chaltlang chakna goal lut lai hi a en liam.

Chaltlang coach Nicky Mal­sawmtluanga'n a game plan hmasa ber goal chhuah loh tihlawhtling thei lo mah se game plan dah ṭhat a la nei a, team ṭha ber zinga mi Bawngkawn an nawr ngam avangin hnehna an chang.

Nimin Inkhel Results
Leitan 2 - 4 College Veng
LEI : Lalremliana 33'; MS Dawngliana 76'
COL : Ricky Rohmingliana 2' (OG); Zothanmawia 14';
Edenthara 16'; R Laldanmawia 55'
Bawngkawn 3 - 4 Chaltlang
BAW : Lalhmunsiama 10'; H. Lalmuankima 30'; MS Dawngliana 60'
CHA : Malsawmzuala 42' (P), 79'; PC Lalhriatpuia 45', 68'
Quarterfinal
June 12, ThawhṬanni
11:00 AM ITI Veng Vs Ramhlun South
01:30 PM Chhinga Veng Vs Salem Veng
June 13, Thawhlehni
11:00 AM College Veng Vs Chaltlang