Real ropuina Ronaldo leh Zidane

June 3 zan a ni a, Cardiff khawpuiah Real Madrid-in an Champions League nomawi an humhim - hetiang ti thei club dang an la awm ngai lo. Real tan goal hnih khungtu Cristiano Ronaldo chu player langsar a ni a, Champions League nomawi meuh a humhim hnu pawha 'Khawvela coach ṭha ber ka ni lo' la ti fantu Zinedine Zidane-a ropuina hmuh hmaih theih a ni lo bawk.

Ronaldo-a'n kum 32-a tling tawh a, players tam zawk chu kum 30 an pelhin chuai lam an pan ṭhin. Ronaldo erawh a ṭha tulh tulh emaw tih tur khawpin a khel a, "Engtia awm thei nge mihringah?" tih mai hial tlak a ni. Mahse, Portuguese forward ropuina phenah Zidane a awm a, French manager-in Portugal captain a chhawr thiam dan hi khawvel hriat chak a ni.

Zidane-a bul ṭanna

January 2016-ah Zidane-a'n Real Madrid a enkawl ṭan a, heithlai hian La Liga table-ah Real chu pathumna an ni. Zidane-a'n league-ah harhtharna a thlen zo lo a, Champions League nomawi a chawi thung - mah se 'vanneih vang' tia French manager hlawhtlinna deutu an la awm cheu a, hnial ngawt theih lah a ni hek lo.

Mahse, 2016-17 season ṭan dawnah Zidane-a'n tum chiang tak a nei a, chu chu Barcelona pet chhuaka league champion nih leh Champions League nomawi humhim a ni - a thil tum ti hlawhtling turin Zidane-a'n tih tur pakhat a nei a, chu chu hlawh tam rual player-te 'thuawih' tura chher a ni a, a bik taka enkawl ngai chu Ronaldo a ni.

Zidane a ṭawng...

"Zidane a ṭawng chuan, ngaihthlak chu i tih tur a ni..." tih hi ṭawngkam pakhat chu a ni. Rafael Benitez kha coach ropui tak ni mah se footballer ṭha a nih loh avangin Real-a player tam takin a thusawi an awih lo nia sawi a ni a, player-te nen inpawhna thuk tak an nei lo bawk.

Zidane erawh khawvela footballer ropui ber pawl a ni a, tuna a player tam zawkte thlen phak loh thlengtu a ni. Hei vang tak hian player-ten an zah a, a thusawi an zawm lo ngam lo. Season hmasa Champions League final an khelh pawh khan player tam tak an zam laiin Zidane a ṭawngkam chu, "Khelh ve theih ka chak takzet a ni," tih a ni a, player-te tan chung en loh chu har tak a ni.

Ronaldo ngaithla rawh...

Euro 2016 final-ah Ronaldo a inhliam a, a kumin tam lam a pan tawh bawk si avangin ngai a awh leh loh hlautu an tam hle. Mahse, Zidane-a'n uluk takin Ronaldo-a hnenah thu a hrilh a, "Ka thu i ngaih pawimawh chuan kum dang zawng aiin season i hmang ṭha zawk ang a, i career hi i beisei aia rei i hmang ang," tiin. Ronaldo-a'n a pu thusawi a ngaithla a, a thuawih 'rah' chu hrilh nawn kan ngai lo.

Ronaldo-a'n club tana nomawi chawi piah lamah mimal chawimawina zawng zawng hui vek a duh ṭhin a, hei vang hian player hmasial tak tia sawiselna thawm pawh a ri ring ṭhin hle. Mahse, Zidane-a'n Ronaldo kumin tam lam a pan tawh tih a hriat avangin Portuguese forward hi mimal chawimawina theihnghilh turin a hrilh a, a khelh rei theih dan leh a daih rei theih dan chu an ngaihtuah ber tur a nih thu a hrilh - Ronaldo-a'n a pu thusawi a ngaithla.

Thu nilovin thiltih

Benitez-a'n Real a enkawl laiin Ronaldo hnenah freekick pet dan zirtir a tum ṭhin a, Spanish manager in chhanletna a hmuh chu inngeih lohna, team boruak chhiatna leh

ṭha tawk nia inhriatna nena chhanletna a ni. Zidane a lo lang a, thu hmangin a sawi ve lo. A freekick pet lai en turin Ronaldo a hrilh a, kum 32-a upa forward thil hmuh chu 'zirlai' vek a ni.

Zidane hian training ground-ah a player-te ball pet puiin a duh tawkin a la bum kual thei a, Ronaldo nen phei chuan freekick hmangin an inel ṭhin - training apianga chak zawk chu Zidane a ni a, Manchester United chher len Ronaldo-a'n zir belh tur tam tak a nei tih a mit ngeiin a hmu a, hrilh nawn fo a ngai lo.

Thutlukna huaisen

Zidane-a'n Ronaldo kum zat a rilruah a dah reng a, World Cup 2006-ah kum 34-a upa a ni tawh chunga khawvel hriatreng tura inkhel hmuhnawm pho chhuak thei coach hian a player hian season dang aiin chawlh a mamawh hnem tih a hria. League match kuaah ngawt Ronaldo hahchawlhtir a ni a, a tirah hrethiam lo mah se Champions League final an khelh dawna Portuguese forward ṭawngkam chu, "Zidane vangin ka hriselna a ṭha a, a hunah tak chawlh hahdamna hun min pein tunah chuan inkhel turin ka inpeih em em a ni," tih hi a ni.

Ronaldo hi season tawp hnaih lamah a bik takin khualmuala an inkhelh dawn reng rengin squad-ah pawh telh a ni lo ṭhin a, Zidane-a'n hun rei zawk a chhawr theih nan rim taka chhawr a tum lo. Real coaching staff ten an sawi chu bench-a a awm chuan Ronaldo hi inkhelh ve chaknain a khat ṭhin a, heivang hian a khelhtir dawn loh chuan Zidane-a'n squad-ah pawh a telh duh lo - chawlh a pe pumhlum tawp a, an match zawha training zawm ve leh mai turin a hriattir ṭhin.

Duatlai Ronaldo

Rafael Benitez-a'n Real a enkawl chhung rei lo tea a thusawi uar tak chu, "Manager aia lian zawk player an awm tur a ni lo," tih hi a ni a, a indah sang hle. Liverpool legend Steven Gerrard meuh pawh khan Benitez chu player-te laka inla hrang tak, manager nelawm loh niin a lo sawi tawh a, Real squad-ah pawh Spanish manager a tla tlum lo.

Zidane erawhin thiam takin Ronaldo a enkawl a, chawl tura a duh hunah lungawi takin a hahchawlhtir thei a, season tina a 'che ṭha ber' nih duha tuihal reng player hi 'mimal chawimawina' theihnghilh turin a hmin thei. A hunah tak chuan a player hi a fak hreh lo a, Champions League final khelh hma pawh khan, "Ronaldo hi ka player nihlai aiin a ṭha zawk. Kei chu goal khung thei tak player ka ni lo a, Ronaldo erawh goal a khung reng a ni," tiin a 'nau' hi chhuang takin a fak mai - a hlawhtlinna khelmualah kan hmu.