Dortmund hi club tha a ni - Bosz

Borussia Dortmund mana­ger thar Peter Bosz chuan a club thar chu khawvela club ṭha top 10 zingah an tel thu a sawi. Kum 53-a upa manager hian Thawhlehni tlai khan Dortmund a zawm thu a tichiang a, kum hnih cham tura contract ziakin German club hian Ajax hnenah pound maktaduai 4.3 an pe nia sawi a ni.

Ajax boss hlui chuan, "Dort­mund hi khawvela club ṭha zual 10 zinga tel phak an ni a, 'Yellow Wall' pawh hmuh ka chak tawh takzet a ni," tiin Signal Iduna Park-a fans tam tak hmaah a club thar kaihhruai a chak tawh thu a sawi.

Pan tur dik

Dutch manager chuan, "Dortmund CEO Hans Joachim Watzke leh sporting director Michael Zorc te nena inbiakna kan neih khan he hmun pan hi ka tan a ṭha a ni tih ka hre­thiam nghal a, anni nen hian inlungrual takin hna kan thawh ho theih ka beisei a ni," a ti.

Bosz chuan sawi chhun­zawm­in, "Germany nena inrina bula cheng ka ni a, naupan tet aṭangin Bundesliga hi ka en nasa hle. He ramah hian Hansa Rostock tan pawh ka lo khel ve tawh a, ka ngaihdan chuan Bundesliga hi khawvela league inelna hautak ber a nih avangin inelna hmachhawn hlan ka nghakhlel tawh hle a ni," tiin chona thar hmachhawn tura a inbuatsaih thu a sawi.

Mangṭha Ajax

Netherlands international hlui chuan kum khat lek a cham hnua a chhuahsan tak Ajax mangṭhain, "Ajax ka chhuahsan a ngaih avangin ngaihdam ka dil duh a, player naupang leh talent nei ṭha tak awmna hmuh niin thawhpui an nuam takzet. Hrehawm ka ti a, mahse hei hi hringnun chu a ni si," tiin Dutch club chu awlsam taka chhuahsan a nih loh thu a sawi.

Feyenoord player hlui chuan Europa League final-a Manchester United nena an inkhel kha sawi kaiin, "Holland lamah chuan kha thil thleng khan titi a la luah reng a, mahse tunah chuan Dortmund chiah ka ngaihtuah tawh. Ajax chu thil kal tawh a ni a, kei chuan hmalam hun ka thlir a ni," a ti a, Ajax rawlthar duhawm Kasper Dolberg a chhawm dawn leh dawn loh erawh a sawi duh lo.

Mangṭha Bosz

Ajax managing director Edwin van der Sar chuan, "Bosz-a chhuah chungchanga ka awmdan hi ka sawithiam lo. Ka lawmpui rualin ka ui em em bawk si. Season hmasa ṭan dawna Peter kan lakluh khan kum khat lek kan thawk ho ang tih kan ngaihtuah pha lo," tiin an manager chan tak chungchang a sawi.

United keeper hlui chuan sawi chhunzawmin, "Season duhawm tak kan hmang a, a bik takin Europa League-ah kan che ṭha hle. Europe-a club lian tak tak ten kan player-te an hel rualin manager ber pawh an hmuh hmaih bik lo a ni," a ti a, Ajax rawlthar rualten rimtu an ngah thu a pha lo.

Tu nge Bosz?

Season hmasa ṭan a nih hma thleng kha chuan Peter Bosz hi football khawvelah hmelhriat hlawh a ni ngai lo. Mahse, season hmasaa ropui taka rawlthar player rual awmna Ajax a kaihhruai hnuah erawh Bosz-a chanchinin ngaihven a hlawh hle. Season hman zawh takah khan champion Feyenoord chu point khat chiahin an phak lo a, Europa League final-ah United an ngam lo bawk.

Bosz hian January 2000-ah khan amateur club AGOVV Apeldoorn enkawlin a coaching career a ṭan a, kum 2002-ah national amateur league champion a nihpui. Kum 2002-ah vek professional zinkawng zawh ṭanin Dutch league club De Graafschap-a enkawl a, a relegate pui.

Bosz thawhlehna

Player a nih laia defensive mid­fielder rorum ṭhin tak hian tluk hlen a tum lo. De Graaf­schap-a relegate pui hnuah hian second division club Heracles Almelo lam a pan nghal a, a season hmasa berah Eredivisie (Dutch league) a invawrh kai pui nghal. July 2006 khan a club hlui Feyenoord-ah technical director hna thawk tura an sawmna a pawm a, Giovanni van Bronckhorst, Roy Makaay, Tim de Cler, Kevin Hofland leh Denny Landzaat an lakluh theih nan thawhhlawk viau mah se coach Gertjan Verbeek ban chungchangah club thuneitute nen an inhmuhthiam loh avangin January 2009-ah a bang.

A club hlui Heracles lama a kir hnuah Vitesse a enkawl leh a, club naran tak nia lang hi Europa League playoff hial a hruai thlen avangin a hming a

ṭha hle. January 2016-ah Maccabi Tel Aviv a enkawl a, Israeli club a enkawl chhung hian match 19 kaihruaiin tlawm hmel a hmu miah lo. May 2016-ah Ajax lam a pan a, a hnu lam chanchin hrilh nawn kan ngai tawh lo.