Germany leh Denmark inhnehtawk

Thawhlehni zan inter­national friendly match-ah Denmark chu an mikhual Germany nen 1-1 in an inhnehtawk.

Brondby Stadium-ah mualneitu lam tan hian Tottenham midfielder Christian Eriksen-a'n minute 18-naah goal hmahruai a khung a, an chak tlang pui dawn niin a lang hman.

Mahse, team huaisen tia sawi ṭhin Germany an beidawng duh lo. Star player tam zawk inlan loh zanah Joshua Kimmich chuan minute 88-naah an siphurh a sut a, goal dang a luh belh tawh lo.

Ram pahnihte hi 1992 European Championship final-ah khan an lo intawng tawh a, Danes hian 2-0 in hnehna an chang tawh a ni.

World champion Ger­many hian Confe­derations Cup khel turin Russia an pan dawn a, June 22 hian Copa America cham­pion Chile nen an inhmachhawn dawn a ni.

Denmark hian World Cup qualifier an khel zui dawn thung, June 10 hian Kazakhstan an lenchilh ang. Denmark hi Group E-ah pathumna an ni mek, an chungah hian Montenegro leh Poland te an awm.