Power Sporting Club-in final lut

Power Department Sporting Club chuan Durtlang 3-0 a sawpin GIG Motors Pro Volleyball League hmeichhe inelna lamah final an lut.

R. Dengṭhuama Indoor Stadium, Mualpuia inkhelah Power SC hian 25-23, 25-14, 25-23 in hnehna an chang, an league round hmasa zawkah Electric Veng 3-2 a an hneh tawh vangin hmahruaitu ni chungin final hi an lut a ni.

Power SC tan Vardingliani chu player ṭangkai niin LG D3 Player of the Night atan thlan nawn a ni. Durtlang tan Lalremruati Pautu chuan point 14 hmuin captain B. Tlangmawii Varte chuan point 10 hlawh chhuak ve bawk mah se hnehna chan nan a tawk zo lo.

Hmeichhe inelna lamah hian team pathum chiah an inlan. Aizawl district champion Durtlang hi chak lo mah se final luh theihna kawng a la ping vek lo. Inrinni zanah league round khar nan Electric Veng nen an intawng leh ang - a chak zawk tan final lut theih ve ve a la ni.

Zanin dar 8:00 hian a hmun ngaiah mipa league round khelh zui a ni leh dawn. Semifinal lut chiang tawh Chhinga Veng leh TNT an inhmachhawn ang.

Semifinal lut hmasa ber Chhinga Vengin vawi thum an khelh tawhah 3-0 vekin hnehna an chang a, point kua an hmu. TNT lakah set khat an lak hrim hrimin league-a sang ber an ni dawn chiang.

TNT-in vawi thum an khelh tawhah point thum an nei a, team panga inel zingah palina niin an hnuaiah 3rd MAP an awm a, an inkarah point khat a awm.

TNT hian Chhinga Veng an hmachhawn rualin league an khel zo dawn a, point thum an thawk chhuak thei a nih chuan an tlang nghal ang. Set hnih hlohva an chak emaw an chak lo emaw a nih chuan Zirtawpni zana RSC nena inkhel tur MAP dinhmun an ngaichang zui dawn a ni.