Zanin aṭangin Commonwealth Games

Commonwealth Games 2022 chu zanin dar 11:30-ah an hawng dawn. Mizoram aṭang pawhin live a en theih a ni ang - Sony Ten, DD Sports leh Sony Liv ten an ti chhuak dawn, mahni in lum aṭangin a en theih dawn tihna a ni.

A tira ruahman dan chuan India tan, tournament hawnnaah Neeraj Chopra chu hnam puanzar kengtu (flag bearer) tur a ni. Mahse, Olympic gold medallist hi hliam vangin a inlan thei dawn lo, badminton player PV Sindhu chuan a keng thung ang.

CWG chu
Kumpinu (United Kingdom) awpna hnuaia awm tawhte inelna a ni a, kuminah hian ram hrang hrang 72 aṭangin infiammi 5,054 vel zet an kal khawm ang, infiamna chi hrang 280 hmangin an inel dawn a ni.

Inelna hmunpui ber atan Alexander Stadium hman a ni ang, kum 1976 aṭanga an hman tawh stadium-ah hian entu 18,000 an awm thei. Commonwealth Games neih nana an hman dawn vang hian mipui 32,000 leng turin an tilian.

Olympic ang bawkin infiammi kal khawmte hi an awmna tur hmun bik siam a ni. Olympic Village ang ni loin, tun ṭumah chuan hmun pathum buatsaih a ni thung a, hripui leng vanga inkhuahkhirhna leh inkhunghranna ang kha a awm dawn lo.

India tan 2015
Commonwealth Games 2022-ah India chuan infiammi 2015 a tir chhuak, team inelna cricket leh hockey khel tur an tam avangin zin chhuak hi an tam deuh, mimal inelna hmachhawn tur pawh ṭhahnem tak an awm tho.

Badminton world number 1 hlui PV Sindhu chu India tana medal beisei sanna a ni. Olympic medal vawi hnih la tawh bakah hian Manipuri rit chawi chak Mirabai Chanu pawh rinkai zinga mi a ni - ani hian Tokyo Olympic neih zawk takah khan silver medal a chawi chhuak.

Wrestler Bajrang Punia leh Table Tennis player Manika Batra pawh en bik hlawh tur zinga mi an ni dawn. Boxer Lovlina Borgohain lakah pawh beiseina a sang a, ani hi Olympic hnuhnung bera bronze medal la thei kha a ni.

Mizo pahnih
Mi ram leh mi fate chauh telna tur a ni bik lo. Mizo pawh an tel ve ta zel, kuminah hian Jeremy Lalrinnunga leh Lalremsiami Hmar te chu India tana feh chhuak zingah an tel a, an chesual viau a nih loh chuan medal beisei ngam zingah an tel

Youth Olympic gold medalist Jeremy Lalrinnunga hi weightlifting 67kg huangah a tel dawn. Pathianni tlai dar 4:30 velah inelna a hmachhawn dawn, a tan Commonwealth Games vawi khatna a nih avangin a result tur rin thiam a harsa.

Hockey player Remsiami pawh India player pawimawh zinga mi a ni dawn. India nulate hian an match hmasa bera atan July 29, Inrinni zan dar 6:30 hian Ghana an tum dawn, chumi hnuah Wales, England leh Canada te nen pool match an khel zui leh ang.