A club hluiah Suarez a kir dawn

Luis Suarez chu a chhawr chhuahna Nacional-ah a kir leh dawn. Liverpool leh Barcelona striker hlui leh Uruguayan club Nacional te hian inrem lailawkna an nei tawh, an inrem dan hi chiang taka tarlan ni lo mah se FIFA World Cup 2022 thleng niin an sawi.

Kum 35 mi Suarez hian Atletico Madrid tana a contract a hmang zo, club nei loa awm lai a nih avangin a thlawnin a duhzawng club a zawm thei. Nacional nen sawizawm an nih khan fans an phur takzet.

Stadium chhungah Nacional ṭantu mi 20,000 chuangin Suarez hmel anga siam hmaikawr an vuah a, ropui taka an chherchhuah player hi koh kir leh ngei an duh, tunah chuan fans lam duhthusam hi a thleng dik dawn ta a ni.

Suarez hian kum 14 mi chauh a nih laiin Nacional youth team hi a zawm, kum 19 mi a nih thlengin he hmunah hian a awm - chumi hnuah Europe lamah inkhel turin a kal, khawvela striker hriam leh hmuhnawm berte zinga mi a ni phak.

Uruguay tana match 132 a khelh aṭanga goal 68 khungtu Suarez chuan, "Tun hnaia Nacional fan-ten kei leh ka chhungkaw chunga an thil tih hi a ropui a, kan thinlung a hneh takzet. Thutlukna kan siam theih chhan pawh a ni.

"Hetiang hun remchang ṭha hi chu bawhpelh chi niah kan ngai lo, Nacional tana khelh leh theih hi thil châkawm a ni, inrem lailawkna pawh kan nei tawh. Hun rei vak lo chhungin inremna puitling pawh kan nei thei ang," tiin a sawi.

Reds leh Barcelona hma hian Ajax Amsterdam tan pawh hlawhtling takin a lo khel tawh, a kalna lam apiangah goal khung a harsat ngai lo.