West Ham striker thar Scamacca
Premier League club West Ham chuan Sassuolo striker Gianluca Scamacca an lalut fel ta. Italy international manah hian pound maktaduai 30.5 zet an hmang a, kum nga daih contract a ziak - kum khat dang pawhsei belh theih a ni bawk ang.
Kum 23 mi Scamacca hian season hmasa khan Serie A match 36 a khelh aṭangin goal 16 a khung a, Italian football inelna sang berah hian goal khung tam pahnihna a ni, season tharah chuan EPL club hmaah fiah a ni dawn.
Scamacca chuan, "Hetiang hun lo thleng tur hian rei tak ka nghak tawh. Premier League khelh hi ka duhthusam a ni. West Ham tana khelh ka châk tawh a, ka ngaihdan chuan ka tana club duhthusam a ni.
"An hnena kal turin min duh takzet tih ka hria a, manager nen pawh uluk takin kan inbia. An hmalak dan leh min chhawr an tum dan an sawite chuan min hneh. Hammers jersey ha chung ngeia inkhelh ka châk tawh hle," tiin a sawi.
A naupan lai chuan Scamacca hi Lazio leh AS Roma tan a khel, chumi hnuah PSV Eindhoven a pan. Tun nipui bazarah Paris St Germain leh Juventus te pawhin an ngaihven, mahse a inkhelh tam theihna tur hmun nia a hriat a zawm.
6ft 5in zeta sang a ni a, ball kangah a hlauhawm, tharum a ngah bawk avangin Italian player dangte ang lo takin Premier League-ah a hlawhtlin theih pawh an beisei, eng ang takin nge a chet theih dawn tih erawh hunin a la hril ang.
Nipui bazar chhungin West Ham hian defender Nayef Aguerd, midfielder Flynn Downes leh goalkeeper Alphonse Areola te an lo la tawh bawk, an lei thar zinga mi Ahuered erawh Rangers nen an inkhelh ṭumin a inhliam nghal a, a kerek zai a ngai hial.
Hammers manager David Moyes chuan, "Tlarhma lam thuam chak kan duh a, chumi atan Gianluca kan nei thei hi a lawmawm. Kum naupang tak la ni mah se tlarhma laia khel turin a ṭha tawk a, thawhho a chakawm tawh hle," a ti.
Season hmasa khan West Ham hian Europa League semifinal an thleng. Premier League-ah pasarihna ni chungin season tawp an hmang bawk, season thar an match hmasa ber atan August 7, Inrinniah champion lai Manchester City an mikhual ang.